Tameṭṭut taqbaylit ɣer tama n wugar n twuriwin i teṭṭef deg tmetti, tessaweḍ ad d-tessenfali tikta-s d yiḥulfan-is s kra n tarrayin i yecban: icewwiqen, azuzen, aserqes, inzan, lemɛun, timucuha… Tedda d unerni n tmetti, tessaweḍ ad d-tessebgen ṣṣut-is d wafrayen-is s ccna d tira, taneggarut-a deg unnar ungalan, tessebgen-d tizemmar-ines deg usenfali, akken ad d-tawi ɣef yal d asentel.
Asmi ara d-nini ungal i tura tmeṭṭut taqbaylit, ad yegzu umseflid neɣ imeɣri tameṭṭut taqbaylit tura, tessezreg-d tawsit i yefkan udem n tatrarit i tsekla taqbaylit neɣ tamaziɣt s umata, Lynda Koudache teṛṛez asalu i tira n wungal s tutlayt-is tayemmat deg 2009 s wezwel Aɛecciw n tmes. Γef teɣzi n 136 n yisebtar i d-tessaweḍ ullis i ibedden ɣef wugar n yisental : Tigujelt, llaẓ, tamḥeqranit, liɣcac n temɣart, tuǧǧla, atɛeddi ɣef lḥeṛma… D ineḍruyen akk i yeqqnen ɣer uwadem agejdan Malḥa, d tudert-is seg was ideg is-yewwi waṭṭan n ttifis imawlan-is, almi d ass ideg d-teggra ɣer twacult n Da Saɛid. Tesker-d yelli-s Wezna s yiɣeblan d wugar n lemḥayen. Γas teḍfer abrid n tmusni, tbeddel tegnit, maca ɛemmi-s war tt-yerḥim, imi yetɛedda ɣef nnif-is deg uɛecciw n tmes.
Tessaweḍ L. Koudache s wungal-a ad d-tessenṭeq tilufa i tettidir tmeṭṭut s yiles n tmeṭṭut, imi ɣef wayen i d-tettmeslay deg yal tikkelt, akken yebɣu urgaz yewwi-d ɣef tmeṭṭut, ur yezmir ara ad yidir iḥulfan iqazzen deg lejwareḥ-is. Tira-s tefka afud i temyura tiyiḍ akken ad brunt i ukukru, wa d-ssizeṛgent ula nutenti. Gar tnaggalin-a: Cherifi Nacera s ungal Tafsut mebla ijeǧǧigen (2011), Belhadj Baya Tiɣri n tmeṭṭut (2013).
Deg 2016 terna-d Lynda Koudache ungal wis-sin, i-s-tewwi araz n Assia Djebbar s uzwel Tamacahut taneggarut. Yebna ɣef talɣa n wungal ameddurman, ɣas ulama d tiḥkayin n tudert n Cabḥa (awadem-asaḍ), maca d isental iḥuzan yal tameṭṭut tazzayrit neɣ taqbaylit s wudem usrid. Gar yisental-a: asemgired n yimawlan gar dderya-nsen, astixer n yimawlan n yessi-tsen seg uɣerbaz, zwaǧ n bessif, berru, uzzu n tassa (lmut n dderya), atɛeddi ɣef tmeṭṭut, tisselbi, tayri, tira d tmusni… Ugar n yisental i d-yettwabedren ɣef teɣzi n 316 n yisebtar, deg-sen tebder-d tnaggalt ansayen iɣef tbedd tmetti taqbaylit, akken daɣen i d-tefka aṭas n wudmawen i tmeṭṭut taqbaylit: tasebṛit, tamjahedt i yefɣen ɣer udrar, taǧǧalt, tayemmat, tamusnawt.
Seg tmetti taqburt d lemḥayen i tettidir tmeṭṭut deg-s, ɣer ubeddel d tatrarit, akken ad d-nwali asentel n tayri deg wungal Gugmen yinzizen (2016) i tura Naoual Maouchi. Awadem agejdan deg-s d Salas. D ullis i yebnan ɣef yiwen yizen i yeqqnen ɣer teqriḥt n lmut, i yettawin imdanen war ma nebna fell-asen. Di taggara negza ayen akken i d-tḍegger d awal tnaggalt ɣef tudert, d wayen iṣeɛben deg-s, ziɣ d tamettant n Dasin i yesgugmen inzizen n Salas.
Daɣen di 2016, yerna-d wungal-nniḍen s uzwel Tifawtin, i tura Jedjiga Anaris, deg-s tewwi-d ɣef lmektub i ijerden ɣef yal tawenza, am Reẓqi At Salem (awadem-amsawal) i iḥeslen deg temsalt n teɛdawt gar yiderma ɣef wakal d tlisa. Γef teɣzi n wullis tanaggalt tefka-d tamuɣli ɣef liḥala n tmeṭṭut taǧǧalt, yettidiren ddaw n uḍar n yilewsan. Akken daɣen i d-tessassen kra n wansayen, am tmecreḍt, d twuri n lemqamat d sellaḥ d lawliya deg tmetti taqbaylit.
Di 2017, iḍeffer-d wungal n Kaysa Khalifi Iḥulfan, anda tessemres aṭas n wawalen imaynuten, s yimeslayen n yal-ass n temnaḍt n Ayt Smaɛel (tama n Burǧ Mira), d ullis i d-yewwin ɣef teɣzi n 285 n yisebtar taḥkayt n tayri i yezdin Yelda d Mbarek, d ugur kan n tiɛiqqert i yesmebḍan gar-asen… Tamuɣli n tnaggalt tezzi ɣef yiɣeblan iɣef tebna twacult taqbaylit, am yimennuɣen gar teslit d temɣart, d usemgired n yimawlan gar dderya-nsen.
Ad neqqim kan deg useggas n 2017, akken ad nekcem deg yineḍruyen n umezruy n tmurt n Lezzayer, deg wungal Gar igenni d tmurt i tura Dihya Lwiz. D yiwen seg wullisen i ijemɛen gar snat n talliyin tigejdanin i yeḥrez umezruy n tmurt n Lezzayer: tallit n tegrawla d uzarug (1954-1962), d tallit n yimennuɣen ɣef tmaziɣt d tugdut (Tafsut imaziɣen 1980 d tefsut taberkant 2001). Tanaggalt tefka ugar n twurwin i tmeṭṭut taqbaylit: tamjahedt, amedya n Faḍma Ibelɛiden. Tameṭṭut yeffuden tamusni, imi Zahra ɣas ma tḥemmel taɣuri, war tt-id-tṣaḥ, imi tt-yegguni zwaǧ n tmara. Mačči d nettat i d tamezwarut neɣ d taneggarut, tuget n Teqbayliyin, ttwaḥebsent-d seg leqraya akken ad zewǧent. Zahra ɣas meqqret, tamussni war tt-tfut, telmed taɣuri d tira, d widak i tufa d lwens-is mi i d-tuɣal ɣer taddart-is.
Rachida Bensidhoum, di 2018 tban-d s wungal Lḥif d usirem, tewwi-d, deg-s, ɣef uḥulfu n tigujelt, tḥuza isental i yeqqnen ɣer tnefsit, Tamilla d wayen i yeḍran yid-s d amedya iyes-s d-tessekfel ugar n tlufa wer neṛḥim tameṭṭut taqbaylit, tagujilt.
Dalila Keddache-Chikh deg 2019, tekka-d nnig tmedyazt d tullisin, akken ad taru ungal, s uzwel Aɛwin, isental-is zzin ɣef lferḥ d lqerḥ i yeggunin tudert n wemdan. Tawacult n Aẓar (awadem-asaḍ) d amedya, yexdem akk ayen i yezmer akken ad d-yeskar tarwa-s ɣef tgejda n tinneslemt… Tefka udem i tmeṭṭut s wugar n tamiwin: Nna Sekkura, tamɣart yeččuṛen d lḥenna ɣef warraw n mmi-s (Asirem d Tafsut), aṭas n temsirin i asen-tesselmed s tmucuha i asen d-tettawi ɣer yiri n lkanun. Tameṭṭut taqbaylit teḥrez axxam-is, imi ɣas ulama teɣli-d tin n Ṛebbi ɣef Aẓar d mmi-s (gan laksida), maca Tudert tezga tettɛawan-d axxam s yiziḍ (iẓeḍwan) n yibeṛnyas, tmessel talaxt, teznuzuy, akken ad d-tɛiwen deg umeṣruf. Ma d Tamilla tefka-d udem n tmeṭṭut yeɣran deg wungal, d tamejjayt iyes-s ttzuxxun imawlan-is, rran akk fell-as taɛkemt n uxxam.
Γer tama n Aɛwin, yerna-d wungal it-icuban Amsebrid n Chabḥa Ben Gana, ddmen i sin ṭṭabeɛ anmetti, imi wwin-d ɣef yiɣeblan i d-yettmagar umdan deg tudert-is n yal-ass. Yebna ɣef uwadem agejdan Asirem, yerna-d ɣef tnac n watmaten, yiwen war yecrih deg-s, imi lḥif d llaẓ yezdeɣ tawacult. Di taggara, wa yesraffeg ɣer lɣerba, wa yezweǧ, yettu imawlan-is, ala Asirem i d-yerran tili i wexxam. Temɣer d taxeddaɛt, tettruẓu tazmert, netta wer ten-yeǧǧi ula yiwen n wass. Taḥkayt n tayri i t-yezdin d Tlelli teṭṭef aḥric hrawen deg wungal, yes-s i d-sbegnen belli tayri d aḥulfi i iǧehden, war nezmir ad yenquqel s shala.
Seg yiɣeblan n tmetti, ɣer umaḍal n uferriɣ, Zoulikha Touati, deg wungal-is Tidet deg target, tewwi imeɣri gar ufariɣ d tilawt s tmazrart n yineḍruyen i aɣ-d-tessaweḍ ɣef Tidet (awadem-asaḍ), d wamek yenfa Busseɛd si taddart ɣef lǧal-is. Iɛedda zman, yuɣ-itt usirem i yuḍnen acḥal d iseggasen, netta yeṭṭalab kan as d-awin tin akken i iwala deg targit, dɣa Busseɛd yeɛqel belli d Tidet. Aṭas n yiɛewwiqen i d-mmugren deg ubrid akken ad ssemlilen gar usirem d Tidet.
Yettkemmil.
Hamoumi Zina
