D aneggal d wawal, d aneggal yeddan d wakud d wadeg; d bab n uxemmem aseklan amezrayan. Gar wayen yellan d wayen ur nelli neγ gar tilawt d uneγlan, tettlal-d tsekla akin i umezruy. Kateb Yacine d bab n yimru n tmussni, d bab yessenfalayen awal ilelli.
Ilul ass 02 γuct 1929 di Qsenṭina, Lezzayer. D ilemẓi yeddren akk ineḍruyen-nni n 08 mayyu 1945 mi yefra ṭṛad amaḍlan, ladγa mayyu 1945 n tmurt. Akken kan i yesεa 16 d aseggas di leεmeṛ-is i d-yeḍḥa d ameḥbus gar watmaten-is iwessaren. Leγben leḥzen ddel; azal n εecrin i iṛuḥen d iseflan deg twacult-is deg taluft-a n mayyu 1945. D tterb n uneggal ameqqran iminig ačiki, Milan Kundera. Annect-a akk yettarra amdan ikeččem deg lebḥuṛ n yisteqsiyen-is, ladγa win yesmedyizen yettaru.
Deg wayen ttḥulfuγ ttwaliγ, tasekla n Kateb tcudd akk γer umezruy qessiḥen n tmeddurt-is, γer temẓi berriken n tmurt-is; γer ddunit-a tameṛkantit yeččan tidiwin n wid yeṭṭef wakud di teṛkent, n yiẓawaliyen yettuγaḍen di tal tama deg umaḍal. Kateb, d axemmem-is i t-yerran yettaru. Bexlaf tamussni-s taseklant neγ aγanib ilelli n tira-s ur yerran lawan d lqiss neγ d tifin, yezga d bab yesduqqusen yessakayen s tektiwin-ines. Yettaru mačči d kra! Tamuγli n yixemmimen-is tεedda akin i tira-s, i tira. D win yeγγazen ddaw n waman; d aneggal war tilisa. D win yeẓran yeḥṣan anda teddun yisekkilen imezrayanen: Yessenqad ula d idγaγen; ah lemmer nessen-as i wemhaz s umata, i wemhaz aseklan ladγa!
Ineḍruyen-nni yedder deg mayyu 1945 ldin-as-d allen i tmeγnest, i tira -tamedyezt, amezgun, tasekla- is yuγal dγa d aneggal yufraren acku yeqqar-d ugar n wayen i d-yessawal umezruy.Yelha uγanib, telha thuski maca daγen, tasekla d ayen nniḍen…tin γur-s, nnig n wayen yura d idlisen ″Le cadavre encerclé, Nedjma, atg″ yeḥṣa s waẓar-is: ″…tisneslemt tiεuṛṛebt zgant d tayuga mgal tamagit tamaziγt…″
D win yessenqaden ula d imyura-ineggalen ifazen i t-icuban i iḥemmel: Γef tmuγli d yiḥussan n Albert Camus d amek akken ara yextiṛ deg uxemmem-is aseklan gar Lezzayer d yemma-s -di tallit-nni n ṭṛad azzayri (1954-1962) – neγ γef wayen yessenfalay di tira-s William Faulkner mi d-yettmeslay γef yiwen deg yiwudam-is, d awudem aberkan, iwumi ur yefki azal, yeğğa-t di tlemmast n tatut di tira-s γas ulamma Faulkner d win yettnaḍaḥen γef yizerfan n yiberkanen deg tama n unẓul n Marikan; yemmut deg useggas n 1962: D aseggas n tmettant n yimyura-nneγ iseklanen iqbayliyen, Jean Lmouhoub Amrouche d Mouloud Feraoun. D win yettarran tiṭ i wid yenṭerren, yeḥṣa nezzeh s yiγeblan-nsen acku deg-sen i d-yekker. D asmekti, d tamayt, d tucbiḥt neγ d tajmilt γef wayen yenna -d abruy kan i d-kkseγ- deg tmedyezt-is yura s tefṛansist i d-suqqleγ akka tura γer teqbaylit, γer tmaziγt:
Kunwi ay imeγban
Init-iyi-d
Ma yella ddunit
Mačči d yiwet!
Ah! Zun d tidet
D kunwi i iwulmen!…
Ay ixeddamen, a wid yeddren tamara
Amek akka at yiεebbaḍ
Sekkfen-kun
U mazal hemmjen deg-wen?
Ay ixeddamen,
D imezwura γer leqdic
D imezwura γer umennuγ
D imezwura γer tmara
U zgan d imezwura tuγ lmeḥna…
Vous, les pauvres:
Dites-moi
Si la vie
N’est pas une!
Ah! Dire que
Vous êtes les indispensables!…
Ouvriers, gens modestes
Pourquoi les gros
Vous étouffent-ils en leur graisse
Malsaine de profiteurs?
Ouvriers,
Les premiers à la tâche
Les premiers au combat
Les premiers au sacrifice,
Et les premiers dans la détresse…
Kateb Yacine d amyaru yessawalen s wudmawen amedyazan d umezgunan: Ur yedkim wul ziγ d imi, ur yettil yiles d inγi…skud nella, ad d-nini. Tudert i tsekla!
Moh Laid Deflaoui
