Seg Asfel ar Tmeddit n wass, si Bu Tqulhatin ar uMurḍus, awal itezzi ḥala ɣef Tudert n tmara n Uqbayli. Ad as-tiniḍ ungal aqbayli seg Tadist yettwaneεlen i d-illul, yeɣli-d gar yifassen n yIcenga n talsa. Deg umennuɣ yellan yezga gar Lḥif d usirem, asirem yebra afus; Bab n wa ad yekkes wa.
Ama yewwi-d wawal ɣef umezruy, am deg Deεwessu n lqayed, ama ɣef yinig, am deg Amjaḥ, neɣ ɣef wayen nniḍen, Taεeǧǧaǧt tezga deg tsekla taqbaylit. Amaru aqbayli yettaru, tiɣimit-is ɣef yIxf n usennan.
Deg ungal aqbayli, am yilmeẓẓyen, am telmeẓẓyin, tudert-nsen tezga Gar ẓẓebra d yifḍisen, ttwaṭṭfen deg Uzeḍḍa n tissit; gran-d ttwaɛellqen Gar yigenni d tmurt. Tamuɣli n uneggal aQbayli, ass-a, d tin n Tiṭ yuli Yilleḍ, yettwali yal abrid d Abrid ɣer tillas, targit-is ḥala Ad ḥerqeɣ lebḥer, iεemmed ad yili d Abrid n twaɣit, d Inig aneggaru, d Tamacahut taneggarut.
Γas ur yebɣi, ungal aqbayli yuɣal d Anza n Tmegraḍ Yessawalen, d Tabrat n uẓekka n yIseflan n tudert; anwa ara tt-yeɣren !
Seg wayen iḍerrun d Uqbayli, ass-a, ungal-ines yuɣal d Agni n twaɣit ideg d-itettruy tiqerriḥin-is, ideg yekkat agejdur almi yuɣal yettaru ɣef Udem-is Tegzer ccmata.
Takemmict-nni tamecṭuḥt n yimura, msakit, ula mi ddmen ad arun, ad afen Imru yundi tamrart. Nesεa kra n yimura d inaẓẓuren daɣen, maca mi kkren ad arun (neɣ ad cnun), ad Ggugmen yinzizen. Win i izemren, Adrar ay uccen ! Maca ulac tarewla si gar yiɣuraf n Tissirt.
Ungal aqbayli am uQbayli meskin; mi yessarem, ula d ajeǧǧig, d Aǧǧeǧig n ugudu; mi iṛuḥ ad iḥemmel, d Tawaɣit n tayri; mi yebɣa ad yesrifeg, d Igider amerẓu; mi yedda kra, Ddunit tettezzi ; ula deg targit, d Targit n lḥif.
Wama εad mi kkren yimura ad siẓergen adlis ! Ad uɣalen akk d Imehbal. Anda-t umaru i izemren Ad yeṭṭeḍ seg tuccent war ma tečča-t ? Maca Yugar ucerrig tafawet ; rnu, ggtent Tfawtin.
Maca anwa ara ifehmen amaru aqbayli di Tmurt yeččan arraw-is ? Yesserɣ Ujajiḥ (bab-is) send ad d-ilal.
Akka i d tunt n Tɣermin yettmeččen?
Amek ara tili akken nniḍen imi d-nekker meṛṛa d tarwa n Mmi-s n yigellil ?
Ahlil-ik ay amaru aqbayli, almi tuɣaleḍ tessawaleḍ Fehmet-iyi ttxil-wat ! Ahat ttif Tasusmi-k!
Abbuh, ay izwilen !
TARIK TINOUCHE
