Tagnawt mazal-itt yeffeɣ-itt leɛqel. Deg yiwen wass , tefka ttiɛad i rɛud d uɣamac yesfunzuren aɣyul. « Akka ara tkemmel, alamma tuɣ taddart abrid n Rebbi », i yeqqar Tayemmum, yal tikkelt ara s-yini walbaɛḍ : « twalaḍ a dda lḥaǧ climat-agi ! ».
Ddurt-agi, Sadiya n l’Euro ur d-teffiɣ ara seg wexxam. Ur d as-tezmir ara i uneqlab n tegnawt. Yal tameddit, rezzun ɣur-s Lbacir akked Belqa. Ass-nni dɣa,teṭṭef-iten s imensi. Tenna-yasen : « ilaq ad nnemsefham ɣef yiwet n temsalt ».
Mi ččan ṛwan, tenṭeq Sadiya n L’Euro :
– Tesnem festival de Cannes ?
– Nessen-it di tilibizyu,s-d-yerra Belqa
-Ula d nekk di tilibizyu i t-sneɣ. Dɣa, laɛca deg-s i lliɣ ttneziheɣ.
– D acu-tt ihi temsalt-a iɣef tebɣiḍ ad aɣ-d-mmeslayeḍ a Nna Sadiya ? Tt-yesteqsa Lbacir
– Γef Festival n Tiɣilt Useksut.
Belqa d Lbacir ssusmen ttraǧun ayen ara d-ternu Sadiya n L’Euro. Tesmar-d lkas n Latay, teswa tajeqqimt, tessers-it ɣef ṭabla, tkemmel deg wawal-is : « Imi tennam, laɛca nek d Feruǧa, yell-is n gma, nwala di tilibizyu Festival de Cannes. D Feruǧa i d iyi-d-isfehmen d acu-t. Mi n fuk anezzeh, tenna-yid Feruǧa belli ula d nukni nezmer ad d-nesnulfu Festival n Tiɣilt Useksut. »
-Mais Nna Sadiya, ur nezmir ara. Ulac tadrimt, ulac ddula, ula d sinima ur tneksib ara, s-d-yerra Belqa.
– Ih, d tidet a nna Sadiya, lecɣal n taddart meqqerit, nukni mezziyit,d-yerna Lbacir.
-Anwa i d awen-d-ihedṛen ɣef sinima. Festival n Tiɣilt Useksut, d Festival n tektabt.
-Tezriḍ a nna Sadiya, amek i d asen- teḍra i rreḥbat n tektabin d-yennulfan. Ass-a d météo, ass-a d technico-adminsitrative. Yal tikkelt d tasebbiwt akken ad aɣ-rren tikmamin. Rnu a nna Sadiya, at taddart, taggara-a, bran i ṭbel deg waman. Ayane akk d-iḍerrun n lbaṭel yessusem-as.
– Ala a mmi, ɣas akken ɛyan, ɣas akken benen-d am akken yal wa yelha-d d yima-is, at taddart ur susumen ara. Ilaq-aɣ kan ad nadi ɣef ṛṛay, d-naf tagnit ara ɣ-yessemlilen.
-Acu-t ihi ṛṛay-im a nna Sadiya.
-Ass icban ass-a, ad awen-t-id-iniɣ. Tura, cegɛet i Rezqi Dezdeg akked Militant ad kkin di temlilit n ddurt d-iteddun.
