Ussan-agi ineggura, kkreɣ-as i tɣuri n yidlisen n Christian Bobin. Am win i ikecmen deg zzedwa n ujdab. 4 n yidlisen. Yal wa azwel-ines. Yal wa melmi i d-yeffeɣ. Yal wa ɣef waci i d-yettawi. Ma d asedyez (poétique) d yiwen. Tummast n tfulka-s (esthétique) d yiwet.
Tikkelt tamenzut ideg ɣriɣ adlis n Christian Bobin deg useggas n 2011. Lliɣ di Fransa. Ufiɣ yiwen seg yidlisen-ines ɣer yiwen n umeddakkel. D adlis meẓẓi. akken i meẓẓi i meqqer. Ur cfiɣ ara mliḥ ɣef uzwel n udlis-nni. Cfiɣ ɣef talɣa n yiḍrisen i d-yeddan deg-s d telqey n wayen yellan deg-s d ccbaḥa i d-yettalin deg-sen am tfenda (parfum) n teslit i d-yukin tanezzayt deg uxxam-is tikkelt tamenzut. Adlis-nni, ad iniɣ d La part manquante. Wicqa ma mačči d netta. Ma d netta, ihi ulseɣ-as taɣuri ussan yezrin. Akken i iyi-yejbed imir-nni i bbɣeɣ deg-s ussan yezrin. Ayen yelhan yelha. Kra n wussan segmi mi ɣriɣ adlis-a di 2011, lliɣ tedduɣ deg temdint n Lpari (lliɣ di tidet ttlawaḥeɣ am ur nesɛi lmeqsud. Nekk di tilawt, d lxiq i xaqeɣ ; ur numeɣ lɣerba, tikkelt-nni qqimeɣ 06 n wagguren di Lpari ; ulaɣer ad teḍsem : nekk, ur zmireɣ i lɣerba). Ihi, beddeɣ sdat kra n ṭwabel ɣef i rsen yidlisen ; subben-asen di ssuma. Greɣ afus-iw, adlis amezwaru i d-refdeɣ d Une petite robe de fête. Amzun d tiɣri. Neɣ d lmektub. Amer kan « lmektubat » am tikkelt-nni. Qebleɣ-ten. Lḥasun… ihi seg yimir-nni, isem n Christian Bobin yuɣ amkan deg wallaɣ-iw. Seg yimir-nni, aɣanib n tira-ines d tfulka n yiḍrisen-ines gan am unina ur nessusum. Akken ad kkseɣ cwiṭ seg tujjmiwin n ccbaḥa n tira-s, selleɣ-as deg kra tbidyutin. Am win ara ak-yinin : taǧǧalt, tesseknaf turin i yigujilen.
Ussan yezrin, kkreɣ-asen i kra seg yidlisen n Christian Bobin. La part Manquante, La petite robe de fête, La présence pure, la grande vie. Ɣriɣ-ten am…. D acu ara awen-in-iniɣ, mennaɣ-awen ayen i ḥulfaɣ mi ten-qqareɣ. Tamedyazt, ɣas ur llin yifyar. Asugnen, inuqel tilisa-s. Idrisen d akniwen, akken i ttemcabin i d-ttḥettimen iman-nsen yiwen yiwen, yal yiwen iman-is ; asedyez-nsen yiwen, d tasarewt ur nɛiqer. Tawsit n yiḍrisen d aggur ur nefri ; awal, ad yeɣzif fell-as ; ccbaḥa-s, yiwen n wudem n ccbaḥa, dinna ay tella tansa-s. Lḥasun… lbenna ɣef terna tayeḍ…
03 n temsal walaɣ-tent uklalent ad meslayeɣ fell-asent. Ɛeǧbent-iyi. Xersum ḥettment-d iman-nsent seg wakken gant d lsas n tira n Christian Bobin. Akka i tent-walaɣ. Tamezwarut d aɣbalu n yiḍrisen. Yal tagnit, yal taɣawsa, yal tallit, yal tiɣmeṛt, yezmer ad tt-yerr Christian Bobin d nnican i tmuɣli yesnulfayen. Tudert n umdan d aɣbalu i tẓubaẓ tiseklanin (possibilité littéraire). Tis snat d tazmert-nni n Bobin mi ara iɛerrek awren n tenfalit taseklant. Seg wakken iferren, iɛerrek, imessel, isewway imeslayen icebḥen, yessen-as i tenwalt n tfulki n wawal. Yessewxar tilisa n wayen izemren ad yili di tmenna n tmedyazt. Yessimɣur annar n tsekla. Tis tlata, yerna s wazal-is : yettarra amdan d lemri n yiman-is. Deg waṭas n yiḍrisen, yerra ameɣri d inigi ama ɣef yiman-is ama ɣef wayen i as-d-yezzin ama ɣef wayen i izemren ad yeḍru. Assaɣ gar win i d-yettmeslayen deg yiḍrisen d win i umi yettmeslay d adiwenni (ɣas udem-is ur iban) ɣef ṣṣwab, ɣef tidet, ɣef tayri, ɣef tdukli, ɣef tɣuri, ɣef tsekla, ɣef tmedyazt… ɣef umdan.
Taggara n wawal, bɣiɣ kan ad d-iniɣ : idlisen n Christian Bobin lhan… Lhan acku lhan… D amedya n wamek ara tili tsekla mi ara tɛeddi akkin i tlisa i as-d-sbedden. Asnulfu d ayen izemren ad yili. Tasekla, akken i tella d yiwet gar tillawin n usnulfu i tella d tabridt yessufuɣen ɣer-sent. Ma d aɣanib, netta, d udem n wayen i izemren ad yili mi ara yuɣal usnulfu d tilawt. Fehmeɣ-d annect-a deg yidlisen-agi n Christian Bobin.
Muḥend Akli Salḥi.
