Tid yuran d ammud n tullisin i d-yettawin ɣef yisental yemgaraden, ddant-d deg-s 09 n tullissin : tin yettḥibbi, dayen tenger !, deg-s yiwet ur d-tecliɛ, kelfeɣ-am Ṛebbi, i tura kemm, ass-agi ad tt-nerwi, bab n tira, ur tent-ttamnet, taneggart-is d tamezwarut.
Ǧamel Maḥrug ilul deg taddart n Ugni Ferru di tɣiwant n At Wasif, yesɛa turagt deg tutlayt d yidles amaziɣ, akked ugerdas n Master deg tsekliwin d tẓuriwin. Akka tura, yettheggi ddukṭura deg tsekla tamaziɣt di tesdawit n Tizi Wezzu.
Ǧamel Maḥrug yessuffeɣ-d ukkuz n wammuden n yisefra : Asḥissef d usebɣes deg 2020, Amakun d usugen : tirga-w d wayen nniḍen 2021, Gar uwezɣi d wanaḍ 2022, Di lǧerra-k, ay imru 2023, am akken daɣen i d-yessuffeɣ deg 2022, ungal Agni n twaɣit .
Tid yuran ! d adlis wis 6 i yura Ǧamel Maḥrug, deg-s 107 n yisebtaren, yeffeɣ-d deg yulyu 2023 ɣer tezrigin Talsa. Tazwart n udlis yegga-as-tt Saɛid Cemmax, ma yella d awal n taggara yura-t Laɛufi Aɛmar.
Adlis-a llant deg-s 09 n tullisin yemgaraden, ad negg agzul d ameẓyan i yal yiwet:
Tin yettḥebbi !
Muḥend d aqcic awḥid n Nna Cabḥa, d agujil, yemmut baba-s asmi yesɛa semmus n yiseggasen kan. Yekker-d yennufcec. Yeǧǧa aɣerbaz zik lḥal, yekcem win n yisaduren, yewwi-d agerdas yuɣal d amaṣut. Asmi yebda ixeddim yessen azal n tidi, azal n uɣrum d uṣurdi. Tɛawen-it Nna Cabḥa yuɣ-d akamyun, yesbedd takebbanit. Yetwel deg yixeddim yerna yettwassen.
Seg wasmi i d-yemlal Lɛeṛbi tbeddel tudert-is, ybeddel abrid… Imeɣriyen ad affen acu ara ɣren.
Dayen tenger !
Times tezger-d iberdan, Agni yerɣa akk, ad teddu s ixammen. Tuget n yimezdaɣ n taddart rewlen. Faḍma terfed arraw-is, teṭṭef abrid d asawen, ɣer Tiɣilt Ugemmun. Lmulud, argaz-is, yugi ad yeffeɣ, yegumma ad isemmeḥ deg uxxam-is, aṭas i yeɛteb fell-as.
Lmulud yeqqim-as-d nnig n uxxam, yeṭṭef ateyyut. Times tezreb, tewweḍ-d ɣer tebḥirt, mačči s cwiṭ n waman ara tt-iqabel…
Deg-s yiwet ur d-tecliɛ !
Kamel d ilemẓi yettideren deg usugen, iḥemmel aɛawez ɣer tuqqna d tiliẓri d yisura n tuzzuft. Kamel tenɣa-t tiffenyent, ur yettɛawan ara axxam yeččuren d lwacul.
Tikkelt tsuter-as yemma-s ad yessuffeɣ lmal. Deg Ugni iserreḥ i lmal, yeɣreq deg yiḍes. Mi d-yedduqes yeǧǧa lmal iṣubb-d ɣer Tiɣilt n Yisɣan ad yurrar dduminu, netta ur nessin ad yurar, yezga iqubel akunṭwar.
Kamel yeɛceq deg umuqel n tullas. Yesla kan i zzhir n lkar-nni amcum iṣeggem iman-is, yezdem-d. Allen-is qrib ad d-ffɣent, nutenti ttaḍsant fell-as, netta iɣil ttaḍsant-as-d. Mačči d yiwet… D lbaḍna n tullist.
Kelfeɣ-am Ṛebbi…
Aksel s kra n wayen i d-yettḥelli yettruḥu deg teqraɛtin d lkif.
Yiwen wass, tusa-d Nna Cabḥa si Lezzayer ad tessefqed axxam-is, tɛedda ɣer Tqerrabt, s aẓekka n Ssi Ɛebdelqader ad tawi lbaraka. Tḍegger ciṭ n usurdi ɣer tsunduqt-nni n wuzzal, tecɛel tacemmuɛt.
Mi tuɣal yewwet-d ucelyaḍ, yessifeg tacemmuɛt-nni, tekker tmes deg Tqerrabt. Ass-nni, Aksel ur yexdim ara, imrabḍen gren-d fell-as lbaṭel …
Texsi tmes, iǧadermiyen leḥqen-d.
I tura, kemm !
Weṛdiya ḥala netta i tesɛa yemma-s d taqcict. D tuḥrict, ccɣel n uxxam terna leqraya. Ur d-tecliɛ ara deg wiyaḍ, telha-d d lecɣal-is, ula di tseddawit akken, tezga weḥd-s.
Weṛdiya ur tessin la tadukli, la tayri, ur tettak i yiwen laman. Tḥemmel kan axxam d temkarḍit, texḍa iberdan d uḥewwes. Ass-nni, mi d-teffeɣ-d seg tseddawit, iḍfer-itt-id yiwen n yilemẓi, teɛjeb-as, yettmeslay-as. Tergem-it, yerna sdat medden.
Mi tekcem ɣer texxamt-is deg tmezduɣt n tullas, terra ɣer texxamt n tarda, tettmuql iman-is deg lemri, yessewhem-itt. Tecqirriw afrayen-is, ur tezmir. Testeqsay iman-is ayen tewɛer akk akken ? Thedder i lemri ahat ad tekkes cwiṭ ɣef lxaṭer-is. Syin tserreḥ i ucebbub-is, tcebbeḥ akk iman-is, tenna i tura kemm, ur tesɛid ara azref ad tidireḍ !?
Ass-agi, ad tt-nerwi !
Ass-agi ad tt-nerwi, d tameɣra n taddart, ttembarrazen yimdanen akken ad kecmen ɣer umraḥ n uɣerbaz amenzu. Yal wa ansi i d-yusa, timɣarin, irgazen, tulawin, arrac, teɛmer taddart. Tulawin cebbḥent-d akk, ilmeẓyen heggan iman-nsen, ad ɣemmzen, ad keḥhlen.
Tameɣra tebda. Imdanen cennun, zhan, nnecraḥen. Imir dɣa, i d-yelḥeq Lḥusin d twacult-is, ha-ta-n izdem-d yiwen n yilemẓi s tkamyunt-is fell-asen. Yeffeɣ-it leɛqel mi iwala Werda yelli-s n Lḥusin.
Imsuddsen n tmeɣra qerrben ɣur-s, ssutren-as ad yeddu s ttawil maca netta yesɣer aqerru-s, yemmeɣ fell-as Maziɣ. Ilemẓi yessenser yeqleɛ am terṣaṣt. Yerna kan cwiṭ isubb deg ubabder, tettetti yis-s tkamyunt trennu armi yewweḍ s Agni Uberquq.
Ur tent-ttamnet !
Yewhem Yuba deg wayen yettwali. Tbeddel akk taddart, tbeddel akk tudert. Deg yal tama izeǧǧigen, tizizwa, ifrax, iferṭeṭuyen, yettwakkes lweḥc i ugama. Imcac, iqjan, tiɣeṭṭen, tistan, akraren, ččan armi dnednen.
Iberdan zeddigit, iḍuman jemɛen-ten. Aman ttmirin, lgaz yella. Imdanen merra umren, lǧiran myeḥmalen, ters-d talwit, ulac lkerh d leḥsed. Arrac tteddun ɣer uɣerbaz am watmaten, am uselmad am unemhal yal wa ixeddem ccɣel-is akken iwata.
Ifurguten llan, zeddigit, rnan ccna n teqbaylit. Imdanen ttalin s leɛqel, ulac amdegger. Ixeddamen n tedbelt ttalḥaqen-d di lweqt, ttqabalen medden s ucmumeḥ. Tiḥuna ččurent d lxir : zzit, awren, ayefk, kulci yella. Cčuren yiḍellaɛen, ferḥen yigellilen…
Bab n tira.
Yeddem-d Muḥend taqerɛet-nni n uzeggaɣ i d-yuɣ sbaḥ, isureg-d lkas yuɣal-d ɣer unaray-ines akken ad yaru. Yemmeɣ ɣef yimru am userdas mi ara yemmeɣ ɣef tmegḥelt-is.
Taswiɛt kan yesla i usṭebṭeb di tewwurt, d mmi-s n xalti-s Wakli, tceyyeɛ-it-id yemma-s yewwi-as-d kra n tɣawsiwin, imi Muḥend yeǧǧa taddart yettidir deg temdint.
Wakli yewhem deg wayen yettwali, yesteqsa Muḥend ɣef wayen i ites ccrab, ayen i yeqqar idlisen, daɣen ayen i yettaru. Maca tiririyin i d-yefka Muḥend d tektiwin-is ur asent-yessaweḍ ara Wakli, imi ahat d ttexmam-nni-ines i yeǧǧan Muḥend ad yeǧǧ taddart-is xas akken iḥemmel-it nezzeh. Inuda anida ara yertiḥ, ad yaru, netta yellan d bab n tira.
Taneggarut-is, d tamezwart…
Si Lḥusin d yiwen seg yimjuhad-nni n tkellax, wid ur newwit ula d tarṣaṣt. Seg wakken yesɛa adrim yečča-t zzux d ttnefxa, qlil win ihedren yid-s deg taddart. Ul-is yeččur d leḥsed d tismin, limer yettaf ula d lehwa d tibḥirt-is kan ara d-tseqqi.
Seg wasmi yeẓra ad semmin fell-as tazeqqa n yilmeẓyen ur yertiḥ, lehdur-is ḥala ɣef way-nni, iḥar ad d-yass wass-n. Uqbel ass-nni s yimalas, yettwaɛreḍ ɣer tmeɣra n uḍeggal-is Wakli, yerna d netta i iwekkel ɣer teɛmamt d lfatiḥa. Amek ala ! argaz d amẓallu yerna yexdem lgirra. D netta kan i yuklalen.
Mi ɣran lfatiḥa, ččan tiẓidanin, yuder-d yisli yeṭṭef-d afus n tmeṭṭut-is. uqbel ad d-tali ɣer tkerrust, yessuter Wakli seg si Lḥusin ad yewwet lewjeh yerna yeggul-as gar medden. Mazal…
Tamuɣli ɣef Tid yuran :
- Adlis macči kan d tidyanin neɣ d tiqsiḍin, imi gar yijarriḍen n yal tullist amaru yessawaḍ-aneɣ-d izen.
- Isental i d-yewwi umaru d wid icudden srid ɣer tumanin nettidir deg tmetti, d isental yesduqusen, yessakayen imeɣri akken ad iṣeggem kra.
- Tutlayt yessemres umaru fessuset, d tazrirgant, amaru ur yesṭuqet ara deg wawalen atraren.
- Tutalyt n umaru zeddiget, tecbeḥ. Rnu ɣer waya asexdem n yisefra, inzan d tenfaliyin icebḥen, d tunuɣin n uɣanib. Tiktiwin-ines frurin-t.
- Taɣuri n tullissin-a ttakken-t-d aḥussu dakken ameskar yettaru iḥulfan-is akken i d-llan di lxaṭer-is, akken i as-d-yenna wul-is. Ad yaf yimeɣri iman-is, ad d-yemmekti, ad d-yessali ccfawat-is, ahat ad yaf ula d netta yemlal-d kra n yiwudam di tudert-is.
- Gar waṭas n tenfaliyin yelhan deg ammud-a, ta, tugar-itent: « ad twehmeḍ amek ur k-ḥemmlen wiyaḍ, mačči d kečč i diri d nutni i yezdeɣ leɣlaḍ, acḥal i ẓiḍeḍ aladɣa ma d asemmaḍ, tettekseḍ lɣec trennuḍ ccyaḍ ». (sb 76).
Taqbaylit deg wannar n tsekla tebda tettak iẓuran, aṭas n tullisin, n wungalen n tmedyazt i-d-yettufraren. Tid yuran, n Ǧamel Maḥrug, yelha ddeqs.
Mohamed Arezki Karoun
