Farid Geslem, d amaru aqabyli n wungal Tiɣri n tlelli i-d-ifɣen deg 2022, daɣen d aselway n Uqusis Usnan Tumast n uUgezdu n tmaziɣt n tesdawit n Bgayet. Timlilit-nneɣ d yid-s tella-d ɣef ungal-is amenzu yufraren s isental-is imaynuten di tsekla tamaziɣt, d wamek yettxemmim tira s umata…
Ungal-is Tiɣri n tlelli, d tiɣri n tlelliyin i ittwaksen i yimdanen, d asekfel daɣen n wayen tettidir tmetti d ubdar n yisula i tt-yurzen, ama d miḥyaf ɣef tlawin ama d rebrab i yessengedwin ddeqs n tmura, nif d lḥarma i ittaǧan timetti ur tettaz ara ɣer zdat xas aken imdane sarwaten di yal tamsalt.
Ungal Tiɣri n tlelli, yewwi-d awal ɣef ubrid n tlelli i-yewwi Saεid deg unadi-is ɣef tsarut. Γef waya, i wacu azwel n Tiɣri n tlelli mačči abrid n tlelli?.
Abrid n tlelli, d abrid i yewwi Saεid si tazwara segmi yella d amecṭuḥ, mi akken i as-d-yeǧǧa gma-s tasarut-nni alami i yewweḍ ɣer Ṣumal anda i t-ukren netta d Salimatu, syin rewlen-d netta d yimddukkal-is d Salimatu ɣef waya d tiɣri n tlelli i iwulmen i ungal-a imi yal taqsiḍṭ yellan i bedreɣ tettak-d tiɣri i tlelli ama d taqsiḍt-nni n tayri n tina i yeǧǧan Saεid di tlemmast n ubrid truḥ ɣer Fransa sin akin tenɣa iman-is, ama d Sliman i iruḥen ḥerraga isεedda atas deg ubrid anda i imuger lmut, Σuṣman daɣen id iεacen miḥyaf deg tmurt-is anida i nuɣent snat n tuddar, taddart-is d taddart nniḍen, ɣef wanect-a akk i as-fkiɣ azwel tiɣri n tlelli.
– A Farid, s wungal-ik, teddiḍ di tira tatrarit, daɣen mi ara nɣer i d-turiḍ ad naf tzegreḍ i tlisa n tmurt; amedya, Saεid iffeɣ si tmurt n Lezayer iruḥ ɣer Fransa syin ɣer Ṣumal, d acu i d iswi-inek deg waya?
Tamezwarut nekk bɣiɣ ad d-fkeɣ izen i yal yiwen i iqqaren d wid i ittarun; Tafriqt ur ttnessin ara akken i nessen Urup, ɣef waya i bɣiɣ ad d-fkeɣ tamuɣli ɣef wamek i ttidiren d wacu i ttidiren ama d laẓ ama d tayri ama d miḥyaf, tamḥeqranit d wayen yessaram ugdud n Tefriqt. Ɛarḍeɣ daɣen ad d-fkeɣ tamuɣli nniḍen i Urup: iruḥ umjay sya-a alami d Fransa, yuɣal yeǧǧa akk tamεict-nni yelhan iruḥ alama d Ṣumal. Sumal nettwali-tt d tamurt n lmut imi nsel akk s rebrab yuɣan tamurt; wa yemmut wa yejraḥ nekk bɣiɣ ad ruḥeɣ ɣer tmurt n lmut iwakken ad d-inniɣ di tmurt n lmut i tella tudert
Deg wungal-ik terẓiḍ kra n yisula yurzen tasekla, ad d-naf tmeslayeḍ-d ɣef tuzuft i d-yellan gar Saεid d Salimatu. Acimi i textareḍ asentel-a?
Tura ma nmeslay-d ɣef tuzuft lan sin yimyura zwaren-iyi-d am mass Lyes Belεidi deg ungal-is Yezger assaka d Zuhra Awdiya di Tiziri, akken ahat lan wid nniḍen. Maca tura lant snat n temsal; tamezwarut, ilaq ad nerẓ leqyud yurzen amaru, tis snat, timsal-a lant di tmetti, nniɣ-tent-id, xater tura ur ilaq ara ad neskidib awal ɣer wayeḍ nif d lḥarma maca ilmeẓyen ttidiren tudert-nsen akken i tt-id-ḥkiɣ neɣ ahat akter. Mačči d lεib ma nxeddem-itt, tikwal nxeddem-itt s tufra tikwal daɣen εinani meεna deg wungal d lεib ! Iwacu?
Deg usentel-a n tuzuft, di tira-k iban-d cuya n ukukru neɣ amek akken, neɣ daɣen ahat akken i tebɣiḍ ad t-id-taruḍ?
Ur ak-skidibeɣ ara deg waya imi yella deg-s ukukru axater ungal amezwaru deg-s ara ad d-tefkeḍ udem amek ara ak-ttwalin yimeɣriyen ladɣa wid i ittḥasaben ɣef waya kan, ur as-tewqiε ara ma yella ungal-ik izad neɣ ala, yedda di tatrarit neɣ igerrez deg usentel. Tella yiwwet n tnelmadt teqqar deg tesdawit tasekla, tewwi yiwen n wungal, kra n wussan tceggaε-iyi-d izen tenna-ak :« Γriɣ ungal-ik alami d asebter wis 52 ḥebseɣ-t, deqreɣ-t dayen karheɣ-t». Aya akk imi tufa bedreɣ-d tuzuft dayen tɣunza-t syin alami i as-sfehmeɣ i tettuqenneε. Syin di tutlayin akk niḍen llan yisental-a, ur fhimeɣ ara iwacu di teqbaylit ur laqen ara ad ilin! iwacu ayen yellan di tmetti ur ilaq ara ad t-id-skefled! Daɣen tufiḍ-iyi-d dina εeddaɣ kan sufella imi deg ungal-inu hedreɣ-d ɣef ddeqs nn yisental, tuzuft-a d asentel gar ddeqs n yisental ; asentel-a ur yelli ara d asentel agejdan.
Deg wungal-ik ugten deg-s yisental yarzan tasnalest?
Nekk qqareɣ tasnalest, ḥemmleɣ ad ɣreɣ ɣef tmettiyin tibeṛṛaniyin akken i qqaraɣ ɣef tmetti-nneɣ. Ungal-a madam xtareɣ ad tekfu teqsiḍt di tmurt n Ṣumal εerḍeɣ ad d-squcḍeɣ ciṭuḥ deg wayen i tettεic tmetti taṣumalit ladɣa ayen tettidir s rebrab daɣen miḥyaf i tettidir tmeṭṭut. Imi di Ṣumal xeddmen lextana i teḥdayin timectaḥ, ur iban amek ara as-nsemmi: d aεdam i εedmen tameṭṭut daɣen kra n laεwayed akka seddaɣ-tent-id kan akka s ufella daɣen di kra n imagaraden i ɣriɣ ɣef tmurt-a anda i d-ufiɣ snuzuyen tilawin ar tmura i ten-iqarben am Qaṭar, Saεudiya… Sexdamen-tent i tuzzuft
Ahat yiwwas ad nwali mass Farid yura-yaɣ-d adlis n tfizikt s teqbaylit?
Ayɣer ala ! D taɣult i ɣriɣ tikkelt tamenzut, rnu ɣef waya leqdic am wayyi ad yili s wazal-is i tmaziɣt, imi leqdicat am wi ur llan ara s waṭas. Ad teqqim kan d tikti alama yewweḍ-d wass-is.
Tadiwennit : Yugurten Laskri
