Acḥal-aya i terɣa ddunit, ḥala asismaḍtizur i d-yettarancwiṭ n rruḥ. Tameddit-nni , yebbuḥra lḥal. Dɣa teffures Sadiya n L’Euro la bouhriture-nni, terfed tafenjalt-is n lqahwa, terra ɣer tebḥirt ad tebbuḥru.
Amecwar akka, tekker seg ulemsir, tekcem s axxam, tewwi-d lecteur CD akked uḍebsi n Cix Lḥasnawi,tekssel-as ɣef ulemsir, tessibnin lqahwa akked « ḥemleɣ-kem, ɛecqeɣ-kem, lemḥibba tesɛa iẓuran, deg ul-iw… ». Tuɣ Lbacir akked Belqasem teddun s axxam n Sadiya, mis slan i « ruḥ a bu tabani, tixeṛ-as i teḥdayt, tugi-k, ruḥa bu tabbani, bu frizi agma yif-uk ».
Mi wweḍen, afnen-n Sadiya n L’Euro tcax di tirga, tunag ɣer temẓi. « Rebbi ad iɛin a nna Sadiya ! », d as-yenna Lbacir. Ur d as-tesli ara. Mazal-tt tcax, teɣreq di cfawat n temẓi. Mi tekna ad terfed tanenǧalt n lqahwa, twala Lbacir akked Belqa i bedden s aqerru-s :
– Ur ken-walaɣ ara. Ɛeslama-nnwen. Qqimet ad teswem tafenǧalt n lqahwa.
– D acu tenniḍ a nna Sadiya lukan ad nruḥ ɣer taddart n Iḥesnawen, di tallit(nni deg yella Lḥesnaw ?, tt-yeccaweṛ Lbacir.
– Ad iniɣ : d acu nettraǧu ?
Amecwaṛ akka, afen-d iman-nnsen di taddart n Iḥesnawen, di tefsut 1944. Kecmen talemmast n taddart, tezzin, tezzin, armi slan i yiwet n tmeṭṭut tettuɣu : « wa Faḍma, d kem ara d-yesenṭwen rruḥ-iw. Yakk nniɣ-am , dayen yefka-kem baba-m i bu tabani. Lukan ad iẓer baba-m tefɣeḍ ɣer tal u temlaleḍ d umehbul-nni yessefruyen, ad aɣ-yezlu di snat ».
Ayen akka d-tenna yemma-s n Faḍma ur t-yezgil ara, yiwen n yilemẓi d-yelḥan deffir Faḍma arrmi d axxam. Belq, Sdiyan L’euro akked Lbacir rran tamawt i yilemẓi-nni.
« D netta d…cix Lḥesnawi ! » i isuɣ Lbacir.
Defren yiminigen n Tiɣilt Useksut i lemẓi, armi yekcem yiwen wexxam. « Anda akka daɣen teddiḍ a bu icalan. Ɣer Faḍma-nni ara yeglun yis-k, yak ? » i tluɛa yiwet n tmeṭṭut, i ibanen d yemma-s.
Awal ur d-yefiɣ ilemẓi. Yuli ɣer tɣurfet, yeddem-d yiwet n tbalizt n ukartun, yerra ar daxel yiwen userwal lubya, taqmejet akked wazal n ɛcra n ikarniten. Isub-d, yeffeɣ seg wexxam. Mi yebɛed seg wexxam, yeḥbes, yezzi ɣer deffir yenna : « fket-tt i bu tabani, ad wen-yeserwu ticriḥin akked lḥemdu. Ma d nek ɛuhdeɣ akal-agi, tamurt-agi i yettaran ẓerb i kra n wayen icebḥen »
Tahar Ould Amar
