Naqal azwel n uḍris-a d wa : « Awal n lɛali d arejdal, awal n diri yettazzal ». Anzi-ya ssneɣ-t maca ttuɣ-t, d ameddakkel-iw i yi-t-id-yesmektin. D tidet, awal yelhan ur yewwiḍ ur t-ssawaḍen… ɣebban-t, mačči am win n diri, yettferfir, ad yaweḍ akken d « aẓeqqal » ! Ufiɣ daɣen tidet-iḍen, awal n « lɛali » yettuɣal « diri-t » ma ur yettwafham ara neɣ ma ur yettwassen ara.
Yezmer lḥal azwel-a ur iwulem ara i uḍris-a, wicqa ! Seg tgemmi-nneɣ i « t-id-cerweɣ ».
Yessuter-iyi-d umeddakkel-iw ad as-d-aruɣ aḍris ɣef wayen yerzan Unicode, Internet… aselkim akked yiferdisen i yellan deg-s. Mi t-kfiɣ, ceyyɛeɣ-as-t d afaylu deg e-mail-ines. Simi i t-yeɣra yerra-yi-d dindin :
—« [deg uḥric-a n yizen iban yerfa, ulayɣer d-aruɣ ayen i d-yenna]… aru-yi-tt-id s teqbaylit timserreḥt aggad Win i k-id-Ixelqen ! D acu-tt teḍrist-agi ? D arraw-iw ara tt-yeɣren a ssaɛqa !… D acu-tt tbazint-agi i d-turiḍ ! Min lmuḥal ad fehmen kra, awalen-a mačči n teqbaylit timserreḥt, impossible, nekk s timmad-iw yebloki uqerru-w ».
Imi d ameddakkel, nniɣ-as err-iyi-d ihi afaylu-nni, tesseɣmuḍ s uzeggaɣ ayen i twalaḍ ixuṣ neɣ ur iwulem ara, ad waliɣ imir-nni amek ara ṣeggmeɣ ayen i zzelgeɣ. Akken i yella lḥal, yerra-yi-d aḍris-nni, ufiɣ ayen akken i yesseɣma s uzeggaɣ d awalen kan, ulac tinfaliyin, ulac tifyirin, ulac tuccḍiwin. D kra n yismawen imaynuten kan, dɣa beddleɣ-ten s kra n « yireṭṭalen » yellan yakan deg tutlayt, ssnen-ten ula d imɣaren akked temɣarin. D awalen n yal ass yecban : ṭṭbib d ufremli, ṭṭabla d ukersi, lkaṛ d ṭumubil, takeṛṛost d umutur, tilifun d lfaks, tilivizyu d tilikomand, tabburt d ṭṭaq, ṭeyyara… lasuri, avontilo, ddiskdur akked uklavyi, kkan-d seg tutlayin-nniḍen izegren seg timawit ɣer tira seg wacḥal aya. Ugar n waya, sḍefreɣ-as izen s teqbaylit timserreḥt iwakken ad nemsefham, nniɣ-as atan nudaɣ deg Dallet, deg FDB, deg Huyghe akked kra n les lexiques-nniḍen, ur ufiɣ ara ayen ilaqen, ihi propoziɣ-ak-d awalen-iḍen, d ireṭṭalen daɣen ɛla kulli ḥal, ad tafeḍ akk ayen yerzan Lunikod, Lanṭiṛnaṭ, Lordinateur akked wayen yellan daxel-is seg lakaṛṭ-mère, leprocesseur, shipset alamma d lecteur CD, rniɣ-ak-n kra n ttawilat ara teṣṭaliḍ akked les logiciels iwulmen i tira. Ssarameɣ bien sûr ad yeddibloki wallaɣ-ik. Ma tsemmḥeḍ-iyi, ad ak-n-fkeɣ rray, conseil d’ami ay aḥbib ; mel i warraw-ik tigemmi-nsen akked yidles-nsen, d wa i d domaine ideg llan akk wawalen n teqbaylit timserreḥt-tanaṣlit, tixxer i tmeckukal-agi n la technologie, les tablettes wa ma acbaha, ur ten-ḥerreṣ ara ad surgen awalen-a n laboṛaṭwaṛ s allaɣen-nsen, si pas la peine ad asen-teččareḍ aqerru-nsen s wayen ur nesɛi la aẓar la laṣel. Ma twalaḍ daɣen ixuṣ uḍris-a, ad ak-iniɣ tidet kan ay ameddakkel, ur k-ttɣurruɣ ara, ɣas nadi-d win ara ak-t-id-yarun axaṭer nekk d aya iɣer tessaweḍ tmussni-w, d aya i ufiɣ sseqdacen-t deg uɣerbaz akked tesdawit, d awalen-a i yellan deg yidlisen : iwnes ussid, asalel, anasiw, agdil, aseɣẓan, aselkim, anuḍaf, tasleḍt, tafilt, anagraw… d tidet ur ten-sqedcen ara lejdud, maca d aya i yellan… Lemmer i terẓiḍ cwiṭ aqerru-k, tnudaḍ, yili ad tafeḍ, ad tqebleḍ ayen i la lemmden warraw-ik deg uɣerbaz ɣas ur t-tessineḍ ara. Ḥreṣ cwiṭ iman-ik iwakken ad tissineḍ xerṣum d tajerrumt n tutlayt-ik, d acu i d amyag, asemmad, tasɣent, tazelɣa, agemmay, aḥerfi, ussid… Afud igerrzen kamim ay ameddakkel.
—« Ayen i d-turiḍ akka deg tfaylut-a d asmuḥyet a winnat, amek ara t-lemden warrac ? Ilaq cwiṭ n wayen fessusen, zeddigen, iwulmen i yigerdan-nneɣ aaah ! Ur ssawḍen ara s aswir n Muḥya, ar imɣuren cwiṭ a wlidi ! »
Dɣa ggulleɣ-as, Wellah-nni igan isem i yiman-is ma ɣriɣ asmuḥyet, ma ssneɣ ilugan n tira-s, ma ssneɣ les critères n yiḍrisen zeddigen wala widen yumsen, kkseɣ awalen imaynuten rriɣ wiyaḍ d « iqburen » am wakken i d-tḍelbeḍ, d aya… Ɣileɣ asmuḥyet d aswir deg umezgun, neɣ ahat ad naf deg udiwenni n wungal neɣ n tullist, d ayen yerzan yiwen kan seg yiwudam, neɣ aha sin : d tin i d tameslayt-is deg uḍris-nni i t-id-iṣaḥen ad t-id-yini, tezleg neɣ texleḍ, ines netta weḥd-s, akken i as-t-id-yura umaru. D tameslayt yemgaraden akked tin n yiwudam-iḍen yecban win icummen, win yesxertumen neɣ win isekṛen…
—« Donc ihi, il y a urgence a winnat, tuɣalin ɣer Dda Lmulud est obligatoire, c’est une nécessité ay aḥbib ! Tient ! Lemmer d lebɣi-k ay ul, ad nepṛofiti daɣen ad nerr ula d tiktubin-is ɣer tneglizit simi ara d-tewǧed tmaziɣt-agi, Yesss ! Ad afen les traducteurs d acu ara ṭṛadwin ».
Nniɣ-as ur ẓwireɣ ara deg teglizit, « just a little » kan, ihi ur ssuqquleɣ ara ; sɛiɣ ugur deg tira n les accents deg tefransit ; ma deg teqbaylit, d ugur n tussda, n tufayt akked usekkil ameqqran deg tlemmast n wawal i yi-igan aḥebbas… ur ssawḍeɣ ara ad fehmeɣ kra n temsal, suref-iyi, maca la ttaruɣ kamim simi ara d-iban ttawil ! Ahat ad tbeddel teswiɛt ad as-ḥeḍreɣ, ad iyi-d-iban ubrid ara aɣeɣ. Wissen amek ara teḍru d wayen i d-snulfan yisdawanen yecban Mohand Akli Salhi, Kamal Bouamara, Mohand Mahrazi, Samia Saad Bouzefrane, Abdelaziz Berkai, Habib-Allah Mansouri, Mohand Akli Haddadou, Kamal Nait Zerrad… tient tient ! ula d Mouloud Mammeri… Iiih ! Lemmer cawren imezwura !…
Yiwen n wass ad aɣ-d-inin : « Am lluɣa-YAGI-NWEN am yisekkilen ilatiniyen i la tesseqdacem, ččuren merra d uguren ! »
Ad yeqqim waya d tikti kan !
Surfem ma yella kra i zegleɣ, i zzelgeɣ neɣ ayen ideg ccḍeɣ deg wayen yerzan taqbaylit-iw timserreḥt, adiwenni-ya d azulal… ur t-ḥemmleɣ ara ! Msexṣareɣ d umeddakkel-iw, lemmer ẓriɣ akka ara teffeɣ yili ur ttaruɣ, ur t-ttlummuɣ ur iyi-yettlummu.
Ramdane Abdenbi
Amaru
