Azekka n yidles deg Maṣer. D adlis yura umaru ameqqran amaṣri Taha Hussein, aseggas 1938.
Deg yiwen yixef i umi isemma: “taɣuri tilellit”, yemmeslay-d ɣef wazal i tesεa tɣuri beṛṛa i wayen yeqqar umdan neɣ unelmad deg wahil unṣib. Yenna: “ taɣuri tilellit d azgen n ulmad, tezmer ad tt-nfeε inelmaden nnig wakken ad ten-nefεen idlisen i qqaren mebla lebɣi-nsen deg yiɣerbazen.
Yefka-d amedya s inelmaden imaṣriyen, yeɣran deg yiɣerbazen ibeṛṛaniyen i yellan deg Maṣer, i yesεan tamussni wessiεen s sebba n tɣuri tillellit, mačči s leqraya i ɣran deg yiɣerbazen.
Yemmeslay-d ɣef umdan, amek yemmug d ubrid it-yessufuɣen ɣer yiswi-is:
“Amdan ilemmed seg wayen ɣer yettruḥ netta s lebɣi-s, mačči seg wayen i as-selmaden s yiɣil. Amdan yettḥibbi annar n tlelli ; mara yili d ilelli, yettak-d akk tizemmar-is akken ad yaweṭ ɣer tqacuct.”
Iger-d awal ɣef wassaɣ yellan gar: uselmad, tamsirt d unelmad. Yenna:
“Timsirin ara d-fken iselmaden deg yiɣerbazen, ilaq ad yili iswi-nsent d asfiqi mačči d aseḥfeṭ. Ad mlent amek ara kerben inelmaden ɣef tmusniwin, mačči d timusniwin ara yemirin deg wallaɣen n warrac.
Aselmad, ur izemmer ara, seg tama ad yesfiq aqcic, ad as-imel amek ara yunag ɣef tmusniwin; seg tama niṭi, ad t-iheyyi akken ad yawi ikayaden ara yesεeddi! Sin iberdan ulamek mlilen, asegmi n uqcic ara yeɣren ad d-yawi akayad d usegmi n uqcic ilelli yettunagen ɣef tifin, ɣef ujdid, ur nettseqniε ara s wayen yessen.”
Yerna yuwi-d awal ɣef yiswi n uɣerbaz:
“Dayi ad nextiṛ amek nebɣa ad yemmag uɣerbaz? D tamacint, ad txeddem timacicin, neɣ d axxam n tafat i ileddin allaɣen d wulawen n inelmaen akken ad fehmen dunnit.”
Yekcem ɣer tsebbubin i yeǧǧan arrac d iselmaden ur qqaren ara, yenna:
“ Arrac ur qqaren ara axaṭer iselmaden-nsen ur qqaren ara. Iselmaden ur qqaren ara, ahat, i mi ahil n uɣerbaz yeččur, ur sεin ara lweqt i tɣuri. Niɣ ahat, i mi cehṛiya-nsen drus, ttexmam-nsen ɣer wamek ara qablen amεic kteṛ n ttexmam ɣer tmusni.
Tuweṭ lḥala n iselmaden alami, mara mlilen, tameslayt-nsen siwa ɣef yinernan deg kexlaṣ, alluy deg umkan n lxedma.
Yeqqel uselmad yesselmad kan ayen i as-fkan ad t-yesselmed.
Afus n Ddulla meqqer deg wannet-a ; mmuten wulawen n iselmaden, mi ttwaten deg leǧyub.”
Ifuk-itt, mi id-yenna:
“Ɣef win yebɣu ires lwam, iselmaden deg Maṣer ur qqaren ara! Ɣef aya, dayen id-lemden deg uɣerbaz i ssnen kan ; win ahat ttettun-t?!
Amek aselmad ur neqqar ara, ad yefk lebɣi n tɣuri i yinelmaden, ad tt-yessekcem ɣer wulawen-nsen?”
El Hadi BELLA
