Nacer Terrad d ameɣnas n yidles. Akken i ibedd ɣef iḍarren-is, yaf-d iman-is deg umusu n tdukkliwin. Yesbedd-d akked imeddukal-is n Tqerbust tarbaɛt Itran ara yuɣalen d tiddukla s wudem unṣib. Asmi yemllal akked tnaẓurt Nasira Benyusef, mmyufan, mmyiḥmalen, bnan sin yexxamen : yiwen i nutni, wayeḍ i umezgun. Di sin ttnaḍaḥen akken ad rnun sser i yidles amaziɣ s umata, ladɣa amezgun. Leqdic-nnsen yufrar-d ɣas ur yeseččay ara aɣrum. Nemlal d Nacer Terrad, yesmar-d afad-is i Tangalt
- Seg wannar n tukkliwin, taf-d iman-ik keč akked tmeṭṭut-ik Nasira Benyusef deg wannar umezgun. Amek d-yella yinig-a ?
Uqbel ad ttuɣal d tidukkla « Itran », tuɣ-tt d tarbaɛt kan i iqedcen deg wannar n yidles. Tlul-d di 2000 di Tqerbust, taddart d-yefkan aṭas n yinaẓren, tedda di lǧerra-nnse. 2010 tuɣal d tidukkla s wudem unṣib, tekki deg acḥal d tafaska, ladɣa tifaskiwin n cna amaziɣ, tewwi-d daɣen acḥal d arraz. Sakin telḥa-d s umezgun. Taceqquft tamezwarut i tessuli d tukkla d « Tirga n umaziɣ ». Teḍfer-itt-id « Timest », taceqquft d-nugem si tmacahut « Aḥeddad n Lqalus ». Seg imir, ladɣa mi d-mmlaleɣ d Nasira Benyusef , tin ara yuɣalen d tameṭṭut-iw, n lah-d ḥala s umezgun, ladɣa « le mélodrame ». D Nasira i d aɣ-d-yefkan aṭas n lǧehd, imi teɣra amezgun, tetturar, tettaru… Di 2016, tessuli Nasira « Taɣdemt , taqbert », nettekki yis-s deg waṭas n tfaskiwin, am tin n Uqbu (arraz amenzu », akked tfaska taɣelnawt n Batent( sin warrazen). Sakin, Itran tesbedd Tiddukla Asayas. Dɣa s yism-a tura Nasira aḍris « Cbaḥa yettrun », yuli d taceqquft i warrac, nurar-itt deg acḥal n tmedinin n Lezzayer, tewwi-d xemza warrazen di tfaska n At Buwadu. Sakkin terra-d Nasira taceqquft n Tunsit Samira Messix ɣer teqbylit tsemma-yas « Yemma Lezzayer ». Newwi yis-s daɣen acḥal d arraz.Sakin tedfer-d Tin Akken, taceqquft i yettwasen. Ussan-a tlul-d « Anz…ul », isem-is yemmal acḥal yeqber unaẓur akked yidles, acḥal i nuɣal ar deffir, acku nruḥ am widen i ifeclen, i yebran i ṭbel deg waman
- Tarbaɛt-nnwen n umezgun tettwasen s leqdic lqayen. Ass-a, tḥella-d amkan-is gar trebbuyaɛ i ifazen di Tmurt, ɣas akken, tekrem i wedrar s tqabact. D acu i d sser n waya ?
D tidet, ma ur tesɛiḍ ara ttawil, yewɛer ad tessaliḍ taceqquft. Maɛan, ma ulac tabɣest, ulac maḍi. D lebɣi akked weḥriret n unaẓur i d seḥ, yis-sen i nteddu. Wamag ulac rbeḥ. Nessalay ticeqqufin s cwiṭ n ṭlaba d unabigi, nbedd s waya, acku nḥemmela amezgun.
- « Anz…ul » d taceqquft taneggarut i d-sbeddem. Asmi i d as-tekkrem, ulac yiwen seg yimḍebren i bedden d tama-nnwen. Rnu, ur tufam ara ula d tazeqqa anda ara tqedcem, lukan i ulac axxam n dda Mexluf, anaẓur yuraren akked Nasira di tceqquft. Yella waya ?
D tidet, ulac seg yimḍebren teɛna temsalt win d-bedden ar tama-nneɣ, ama mi nessuli taceqquft-a neɣ tiyaḍ. Tajmilt i dda Mexluf d aɣ-d-yeldin axxam-is yuɣal d axxam umezgun anda ulint meṛṛa tceqqufin-nneɣ akked tid n wiyaḍ daɣen. Dda Mexluf ibedd ar yidis-nneɣ, tajmilt-is d tameqrant.
Di Tubiret, akken tezram, qqwant tzeqqwa akked yixxamen maca ulac ttawil (asemmiḍ di cetwa, aɣamac deg unebdu). Axxam n dda Mexluf, yebna s wezru, yebbuḥra deg unebdu, yeḥma di cetwa. Axxam umezgun Amar Laskri n Tubiret d itbiren i izedɣen deg-s, mačči d inaẓuren. Acḥal d tazeqqa di Tubiret yeldin maɛna medlent tewwura-nnsent. Dɣa sutureɣ di Tneɣlaft n yidles ad aɣ-teldi tiwwura, ladɣa tid n wexxam n umezgun Amar Laskri. Wali tura, acḥal d taceqquft i nessuli, acḥal d arraz i d-newwi, newwi-d ula d arraz agraɣlan di Canada. Nella-d d inebgawen n lḥerma n umezgun aɣelnaw (TNA) …, ɣadi axxam umezgun n Tubiret yemdel fell-aɣ tiwwura. Ad sutreɣ di Massa Taneɣlaft n umezgun ad aɣ-d-temmuqel, ad aɣ-d-ɛiwen ad nessali « une coopérative » s wayes ara nbedd. Tin ntyezwaren meṛṛa : nebɣa ad tt-nwali, d yid-s nemmeslay.
- D acu twalaḍ ad yenfeɛ akken ad yeddu ar sdat umezgun ?
Akken ad yeǧǧejeg umezgun tlaq tdukkli, lemɛawna. Ayen walaɣ, taggara-a, diri-t : inaẓuren wa yekkat deg wa, wa yettasem seg wa… Ma yella ulac leḥmala akked tdukkli ur t-tteddu ara tẓuri ar sdat. Mara tqableḍ dɣel yettilin deg les réseaux sociaux, ad twehmeḍ. Eǧǧet-aɣ si dɣel, tismin d régionalisme. Win ara d-yernun kra i tmaziɣt ḥesbeɣ-t nneɣ, mreḥba yis-s, ɣas si Somalie i d-iruḥ.
Tin i tent-ɣelben meṛṛa d tismin. Tismin lhant, mara yili sedduyent ar sdat, tid n dir d tismin n tudrin, tid n gma-k yettruẓun ifadden. Uqbel ad nehder ɣef iɛwen n ddula, ad nemmeslay ɣef tezleg-nneɣ yetthuddun
- Laɛtab yella, lɣella ulac. Aya ur kun-yesefcel ara ?
D ṣeḥ, laɛtab yella, lɣella ulac. Nerwa tazliwin akked laɛtab nek d Nasira akked terbaɛt meṛṛa. neskrifiyi axxam-nneɣ. Lukan d ixeddamen i nella(fonctionnaire) deg wexxam n umezgun, ad naf iman-nneɣ. Maɛna akka, nḥemmel amezgun. Nferreḥ mara d-nernu taḥjurt-nneɣ i yidles. D taḥjurt-nni i d lɣella, d taḥjurt-nni ara yernun kra i teqbaylit i d aɣ-yesefraḥen, imi neqqar-as nexdem lwajeb-nneɣ, nerna-d cwiṭ i tzuri taqbaylit. Nessaram ad aɣ-ldint tewwura n wexxam umezgun, uqbel ma nefcel.
Yesteqsa-t Tahar Ould Amar
