Remḍan d remḍan, aɣamac yeffeɣ-d si tjuɣlalt-is, JSK tekkuli, imeḥbas n yiseɣ qqimen-d i yiman-nnsen, la superette n 20 h ur d-ṣaḥ i yiwen, « qufet ramaḍan » akked « lifṭar lǧamaɛi » ssumlen ddunit…lḥaṣun mačči d yiwet ad as-tbeddeḍ deg udem. Ddwa-s ihi d inig, d inig s anda ara yenefsusi wallaɣ, ad yers acemma acemma lxaṭer.
Nesmar liṣuns i tkerrust almi d imi, neṭṭef abrid yessawnen, yettawin s Igawawen. Ur neḥulfa ara s webrid, imi tifasniwin n lḥuman ḥninit lawan-nni. Newweḍ s aswel. Di tqucac, mazal-it wedfel d anagi n Yennayer useggas-a i yerran akkin taqejmurt n fuṛaṛ. Abeṭeḥḍaḥ-nni n waddal i yesfelɛen acḥal d imelyunen, yuɣal d « abduz » n tsita. S ayeffus, tama n Anu, ḍehren-aɣ kra n yilmeẓyen. Jebden deg ugerru. Walan-aɣ-d, ffren igeṛṛa-nnsen deffir weɛrur. Wis ma d leḥya i setḥan neɣ tukdi i yugaden ? Ih, tugdi : nnulfant-d, taggara-agi, kra n les milices cɣul-nnsent ttɛasant win ara yettɛeddin ɣef « ḥurmat ramaḍan ». Ih « Akka, i d Lezzayer ay amendayer » : ečč idrimen n lpitṛul, widak n yixeddamen tt-icerwen merriɣet, widak diɣen n tuǧal akked igujilen…ečč ayen d ak-yehwan ad k-semḥen wat Rebbi ; ma teččiḍ remḍan, terwi fell-ak. Necmumeḥ i yilmeẓyen-nni nkemmel abrid-nneɣ yessawnen.
Ur nɛeṭṭel ara naf-d iman-nneɣ ɣer tama n Tleṭṭaṭ. Nerra takerrust di ṭṭerf, ners-d, nebda flash, flash, flash ! Nmuqel akka d wakka, banen-aɣ-d ilemẓi d tlemẓt mmyiḥnacen, tamuɣli-nnsen twehha ɣer lbeɛd. Ur ḥulfan ara yis-nneɣ, caxen di tirga ; meqqar d tirga argu ɣef yiman-ik : ur tezmir ara la milice ad tekcem allaɣ-ik. Nezzi s weɛrur i yifrax « qui se cachent pour aimer » , nerkeb takerrust, nessawen, almi i ifuk usawen.
Aqla-ɣ deg Ibudraren. Din i nwala iwudam n Muḥya teddun ɣef yiḍaren-nnsen. Wa d Si Leḥlu, wahin d Muḥ Terri, wahi akkin d Si Prtuf, Sin-nni i irefden Tacbaylit swadayen i Muḥ Terri. Am win Yettrajun Rebbi, Muḥ n Muḥ yeḍmeɛ Aneggaru ad d-yer tawwurt. A ddin uqabac, Samuell Beckett, Bertolt Brecht, Molière, Brassens, Pirandello di…snat n tɣaltin d wezgen ! A ddin uqabac, Muḥya ijemeɛ-d aseddayan (universel) di taddart !
Nkemmel deg webrid-nneɣ almi ɣ-d-tewweḍ rriḥa n Tiferzizwit ou le parfum de la mélisse. Nwala La maison ou bout des champs, nenna-yas : mebla cekk d axxam n Chabane Ouhioune. Ur ɛad neffeɣ si Tasaft Ugemun, deḥren-aɣ sin yirgazen ulin tiɣilt.Ahat d yiwet seg Les randonnées avec Ait Menguellet. Neffeɣ Tasaft Ugemmun, neǧǧa deffir-neɣ Chabane Ouahioune d Lounis Ait Menguellet ttleqqimen isefra, ččebiḥen tasekla.
Ur d aɣ-d mazal ara aṭas, ad naweḍ s anda ara aɣ-yeɛreq anda ara ner. Newweḍ ! Aqla-ɣ tama usebdad n Amiruc. Qublen-aɣ-d tlata iberdan : wa d asawen s At Yani, win uyeffus d akessar ɣer Micli, azelmaḍ s At Wasif. Anwa i d abrid ay abrid ?
Tahar Ould Amar
