Ddurt-a, smektant-iyi-d tefsuyin di Tmurt-nni n wis d acu-tt. Acḥal aya ur rziɣ ɣer din. Refdeɣ takarnitt-iw unageɣ. Nniɣ-as, ad mmlileɣ yiwen neɣ yiwet seg widen d-yeslulen Tafsut. Ur tettamnem ara anta i d-mmlaleɣ : Tamaziɣt ! Ih, d tamaziɣt-nni ur nezgil tibeḥnyaq-nni n reffed s ttnefxa yal mara d-taweḍ tefsut n yImaziɣen i mmlaleɣ.
Tangalt : azul a Tamaziɣt ! I ferḥeɣ mi kem-mmlaleɣ.
Tamaziɣt : azul a yelli, ansuf yis-m ! Ula d nek ferḥeɣ mi kem-mmlaleɣ a Tangalt. Acḥal aya ur d-ruḥeḍ. nniɣ-as d ɛeyyu i teɛya Tangalt di Tmurt n wis d acu-tt.
Tangalt : ala a Tamaziɣt, werǧin ɛyiɣ mara d-rzuɣ ɣer da. D acu kan ussan-a i iɛeddan yeqwa-d fell-i uxeddim. Lḥasun, aqli da, rnu d Tamaziɣt s timad-is i d-mmlaleɣ.
Tamaziɣt : ala a yelli mačči d Tamaziɣt i d-temlaleḍ.
Tangalt : amek akka, mačči d tamaziɣt ?
Tamaziɣt : ih, mačči Tamaziɣt i d isem-iw. Mačči yiwen n yisem i sɛiɣ. Siwel-iyi-d : Tacawit, Tmahaqt, Tamzabit, Tarifit, Tacenwit, Taqbaylit, Taznatit, Tagregrent…
Tangalt : ihi, anta i Tamaziɣt ?
Tamaziɣt : d kunwi i d-iyi-semman akka, asmi akken i tettuɣum :« Tamaziɣt di lakul ! ». Di yebrir-nni n tmanyin, yuɣal-iyi-d rruḥ, nniɣ-as : « ɣas ma yeɛreq-asen yisem-iw, ad uɣalen ad t-id-mmektin ». Imiren, ferheɣ dayen kan imi tɛewlem ad iyi-t-skecmem ɣer lakul. Imiren umneɣ belli ad ifak fell-i Rebbi lḥif, ad ddreɣ i lebda, ur d teṭṭeru ara yid-i am Tlatinit, Tiɣriqit taqdimt, Tafiniqit, Tamasrit taqdimt… I ferḥeɣ s lakul-nni ! Kecmeɣ-t am tislit-nni i yeddan s axxam n win akken tḥemmel.
Tangalt : win ara m-d-yeslen ad as-yini ur kem-yeɛǧib ara unekcum-nni tkecmeḍ ɣer lakul d wayen akk d-iḍefren Tafsut n tmanyin.
Tamaziɣit : teḍra-yas i tefsut-nni am wedrar-nni d-yurwen amumad. Nekk, tcekklem-iyi deg ujerrid n tuqqna d tzelɣa n tnila. Ayen i sawaleɣ deg yilsawen, tesgugem-t tira. Uɣaleɣ-asen d adrar i warrac n lakul. Ulal d nutni icekkel-iten, iqber-iten ujerrid n tuqqna. Niqal ferḥen, ḥaren ad iyi-mmlilen di lakul. Nnwan d ixxamen-nnsen ara n-afen, d azuzen ara ten-tezuzneɣ , d inig ara yinigin yid-i di tirga, d Gumball akked Olive et Tom ara sen-d-snulfuɣ s teqbaylit. Ula d nekk ḥareɣ ad mmlileɣ tarwa-w, ad d-geɣ irebbi i widen ara d-yufraren nnig Goethe, Spielberg, Poe, Brecht, Molière, Mozart, Dylan, J.Lennon, Tracy Chapman… Umneɣ, umnen ad nessiweḍ. Taggara, ikref-aɣ ujerrid n tuqqna, « b » akked « v ». Ɣas ini-d d lateṛ n tneɣḍimt-nni i d iyi-mlan.
Tangalt : tesfecleḍ-iyi a Tamaziɣt.
Tamaziɣt : mačči d taruzi i bɣiɣ ad kun-rzeɣ. Rnu, ma terẓem, d nekk i yerẓen. D aḥmal i kun-ḥemleɣ , bɣiɣ ad d-dduqsem, ad d-tecbum leǧnas yeddan deg webrid n sser akked liser.
Tangalt : amek-it webrid-a yessufuɣen ɣer liser ?
Tamaziɣt : d abrid-nni n tussna i wwin lakulat i ifazen di ddunit. Ɛandet-ten ! Dɣa tesmektaḍ-iyi-d : asmi akken i nezheɣ Črek akked Dda Spilu, ferḥeɣ mačči d kra , nniɣ-as : yebda ad awen-d-yettban webrid, bdan la d iyi-seḥmalen i warraw-iw, ad kemmlen akka ad iyi-siḥmilen di texlijin, di tuddar, di temdinin, di sinima, deg uzawan, di tsekla, di, di,….ddunit meṛṛa.
Tangalt : d wa i d asiren-neɣ
Tamaziɣt : ihi, ddut di lateṛ n lakulat yesseḥmalen tutlayin i warrac. Ttut, meqqar deg iseggasen imenza, tira.
Tangalt : amek akka ara nettu tira ? Ma ur nura ara, ur tettiliḍ ara. Yak neqqar-as : « zik wa ihedder-itt i wayeḍ, ass-a di lkaɣeḍ, ad tt-id-afen ineggura »
Tamaziɣt : atan ihi, tenniḍ-tt-id, d wa i yugadeɣ : ad iyi-d-afen ineggura di lkaɣeḍ akken ufan talatinit, tafiniqit akked tutlayin akk i inegren seg yilesawen. Mi d iyi-d-tesufɣem seg waddaynin ad iyi-terrem ar daxel n tzeqqa n yixxamen n yidles. KKse(m)t fell-i aɣebbaṛ i d iyi-sdumbbsen acḥal d lqern aya, cebḥe(m)t-iyi s tira, s ccna, s cḍeḥ, s tirga…
Tahar Ould Amar
