Ass-nni, d Ttlata 9/7/2024. Cfiɣ fell-as am wass-a fell-i. Ifukk-iyi ddwa. Uzzleɣ ɣer laklinik Tudert, ad d-ẓreɣ amejjay-iw, Duktur Meddur, iwakken ad iyi-t-id-yaru daɣen di lkaɣeḍ ; imi yettagi ufermasyan ad iyi-t-id-yezzenz mebla l’ordonnance.
Seg i sweεreɣ i tenhert n tkerrust, ṭṭfeɣ aṭruli. Cwi kan ur yugit ara aṭas n lɣaci ass-nni di Tudert. Sεeddan-iyi-d imir imir. Tuɣ-iten ssnen-iyi. Ẓran yesserka turin-iw wabbu n ddexxan. Ttagaden ad asen-rfuɣ din ma εeṭṭleɣ ur keyyfeɣ ara, acku yettwagdel waya din ɣur-sen. Daymi i yi-zwarayen yal tikkelt.
Mi d-yeffeɣ sɣur Meddur, win i n-ufiɣ sεeddan-t zdat-i, yenna-yi-d, war ma nniɣ-as uma d kra : « Amarezg-ik, kečč meqqar teṭṭaxreḍ-as i dduxxan ! Nekk, yerna-yi.
– Yelha wul-ik ! Mer ad izmireɣ ad t-ǧǧeɣ, ad ak-xellseɣ imensi. »
Nemyenna akka, dɣa teqqim din. Ifuk wawal. Ih ! Ur t-ssineɣ ur iyi-yessin. Uternuḍ amejjay la yi-d-yessawal. Ihi ur d tagnit yessulfen i tfawit. Win yeffeɣ si Tudert, nekk kecmeɣ ɣur Meddur. Wehmeɣ amek almi i yi-d-yesεedda baṭel ass-nni. Yemmerki-yi-d kra n ddwawi, ffɣeɣ-d.
Hniɣ-tt qbala s afarmasyan. Mekkneɣ-as l’ordonnance. Yewwi-yi-d ddwawi-w. Isettef-iten-id ɣef udekkan-nni i d-yezgan gar-i yid-s. Wwteɣ ɣer lǧib, ad xellseɣ am urgaz. Afeɣ-t d ilem. Sderdfeɣ merra iceṭṭiḍen i lsiɣ, ulac. Ziɣ wiss wi yi-yukren idrimen-iw deg uṭruli, ur ukiɣ d yiman-iw. Nniɣ-as :
– Ihi yecqa-k a mass, eǧǧ-iyi-ten di rrif sileεḍil, simi ara d-berneɣ…
– Ur ttεeṭṭil ara aṭas. La tettwaliḍ, ḥala nekk i yellan da, cwiṭ akka ad nnesreɣ sya. Ma tufeg, ad d-zziɣ deffir imekli, imi ata d tikli ad izeggen wass, yerna lluẓeɣ. Teẓriḍ kan aṭṭan n sskeṛ amek-it, ur k-εniɣ, yesseččay tamara.
– Mačči d aɣbel. S ḥellu-k.
Ur zziɣ, ur nniḍeɣ. Snedheɣ ul-iw ad neεnu lbanka skud ur d-rrin tiseɣlit-nni n wuzzal. Gemneɣ ad d-jebdeɣ meqqar cwiṭ n lufer-nni i n-ǧǧiɣ di lkunt. Afeɣ-n d agani. Iṣaḥ-iyi-d wuṭṭun wis 22.
Ɣas tura, ɣas tura ; wwah ula d kečč ! Ssumet akal ar din terkuḍ, tiniḍ-as i lweεd ayen akka. Ugaren llayemmutat. Ur sεeddayen ara yiwen alamma yeffeɣ-d wul-iw. Kan akka, ad aɣ-d-inin dakken tellukkez antirnit. Tikkwal ẓẓayet, tikkwal ulac akk. Zunakit mačči seg-sen i d-tekka. Ssebba, cwiṭ ; lhemm, aṭas.
Ata yuma-yi-d yiwen. D bu tzuɣmaz. Yusa-d srid ɣur-i. Iluεa-yi-d amzun nemyussan :
» Kečč iban akka yeffeɣ-d wul-ik. Ma ulac fell-as, n wacu uṭṭun i k-id-iṣaḥen εni ?
Zzakkneɣ-as-t.
– 22 ? Ad yelhu.
– Yelha wul-ik.
– Ad yelhu kan. Yya ad ak-iniɣ !
– D lxir ?
Yessenεet-iyi-d ajuṭun-ines. D uṭṭun wis 5. Yettaɣ lḥal bab n wis 4 ha-t zdat lgici. Ula segmi d-tewweḍ ddala-s, yeggunni tuqqna-nni tamcumt. D acu ara yi-d-yini winna ? Yenna-k :
– Ad nembaddal ?
– I kečč, amek ? cmumḥeɣ-as acmumeḥ n win ara as-yinin, limmer ad nembaddal ijuṭunen, ad ak-kelxeɣ.
Ad as-tiniḍ yesla-d i tedmi-w. Ideqqem-iyi-d s tririt yecban ta :
– Winna d ccɣel-iw. Ur ttḥebbir ara ɣef dadda-k. D acu, tella yiwet n tfada.
– D acu-tt ?
– Iwakken ur iyi-tettkellixeḍ, ur ak-ttkellixeɣ ; nekk ad ak-fkeɣ lxamsa-w, kečč ad iyi-tefkeḍ abandu deg wayla-k d tmudi n ddurt.
– Ur gziɣ tabruyt.
– Nniɣ-ak, ad nembaddal nnuba belḥara ad iyi-treḍleḍ yiwet n ddurt seg wakud-ik.
Mi yi-d-yenna akka, yezzakken-iyi-d ajuṭun-is, d 5-nni i umi isemma lxamsa ; yessenεet-d ɣer 22-nni-inu i d-iwala s afus-iw zun d abandu.
– Amek, amek ?
– Fk-iyi kan 7 wussan yezrin s wuḍan-nsen. Ur ttagad, ad ak-ten-id-rreɣ mi ara d-qqleɣ ticki.
Ɣilleɣ la yettmeεεik fell-i. Huzzeɣ aqerru-w, ḍsiɣ-d. Nniɣ-as s unecreḥ :
– I sakin, amek akka ara ak-n-fkeɣ ddurt ? Ɛni d taqecwalt n tmellalin iwakken ad ak-tt-reḍleɣ ar d-arwent tyuzaḍ-ik ?
– Nniɣ-ak, winna d ccɣel-iw. Imekken-iyi-d ajuṭun-ines, ikemmel awal-is.
– Ini-yi-d kan, ih, fkiɣ-ak-tt ; yexḍa-k waluf.
– D aya ?! Ihi ata fkiɣ-ak-tt. Ax !
Sneεmleɣ fkiɣ-as kra.
Ṭṭfeɣ-d ajuṭun-is, mekkneɣ-as winna-inu. Yemmeɣ-d fell-as, yejleq-iyi-t am win yugaden ad qqleɣ deg wawal.
Nembaddal nnuba, yekka tawwurt. Sḍefreɣ-as tamuɣli. Yeqleb-d ɣur-i. Iɣemmez-iyi-d s ucmumeḥ. Dindin tefsi tugna-s gar wallen-iw. Ur iban sani yerra.
Amecwar akka ḍehren-i medden akk myesmuqalen. Sliɣ i zzhir d unejqeq, ssan-as-d i yigedrez. Dɣa yendeh umenduh. Yekker uhetwir di lbanka. Tenhewwal liḥala. Wa yettuɣu, wa yeṭṭef-itt d tazzla ɣer berra. Yewqeε-itt ddḥis di tewwurt. Tarewla temneε bab-is. Ziɣ la tettenhezzay ddunnit. D zznezla ayen i yewwten. Tetti fell-i teswiεt. Tezzi yis-i lqaεa. Ṭṭfeɣ aqerru-w, ad sseḥbibreɣ fell-as ammar i d-iɣellin ɣef ucelqiε-iw. Kkreɣ ad rewleɣ ula d nekk, meεna urzent-iyi temlellay ; ttmujuɣ yerna ur walaɣ ula d anda ad serseɣ iḍaren-iw. Tuɣ tettwagzem trisiti. Temḍullas tzeqqa n lbanka. Anef, ma teččur-iyi, ttif ad d-yeɣli fell-i igenni wala ad iyi-slefɣen widak-nni yemsewqaεen deg yimi n tewwurt. Cwi kan ur tεeṭṭel ara ddeqqa-nni. Tεedda zznezla war ma ḍran-d ibaxixen yugaren ayen walant wallen-iw.
Cwiṭ akka, uɣalen-d lɣaci mi d-tuɣal tafat. Ufiɣ-d iman-iw zdat lgici. Amzun acemma ur yelli. Mekkneɣ-as ccikk i uxeddam-nni i yi-t-id-yessutren. Yettaɣ lḥal heggaɣ-as-t-id. Simi i icar tiṭ-is ɣer-s, yerra-yi-t-id. Nniɣ-as :
– Ssuref-iyi, ttuɣ ur ak-n-fkiɣ ara lkarṭa n yisem.
– Fiḥel nnekwa. Uma riɣ-as.
– Ihi acimi i yi-d-terriḍ chèque-agi-inu ?
– Tjeggḥeḍ-as aεemmer ay gma-tneɣ. Ẓer ziɣ la date i turiḍ deg-s !
– Yak ass-a d ttlata ?
– D ttlata, ih ! Belḥara ass-agi mačči d ass n ttlata n wass-a, d ttlata n ddurt i d-iteddun ay turiḍ fell-as ay ameddakel. Alamma d ass yecban ass-a i nezmer ad ak-t-nsεeddi ccik-agi-inek. Ɛemmer-aɣ-d wayeḍ ma tebɣiḍ ad k-nsellek tura hah.
– Annaɣ ay argaz lεali, ḥala wagi i sεiɣ, yerna ifuk-iyi ddwa…
I wumi theddreḍ ! Ḥellel neɣ qim, sqizzeb neɣ qim ; yeggumma ad d-yefk udem. Ula d inagan-nni i as-nniɣ ad d-neḥlen fell-i, fud-nni ddan yid-s.
Sliɣ-as i yiwen s wallen-iw, mi yewwi aḍad-is ɣer tewwurt uqerru-s, la as-yeqqar fell-i i winna, ur t-ttεanad ara ttxilek, rwin-as lexyuḍ meskin. Ahat ur yeswi ara ddwa-s.
Rachid Tighilt
