Tamedyezt d tawsit n tsekla yuɣalen ciṭuḥ ar deffir iseggasen-a ineggura di tmetti-nneɣ. Imi amedyaz am wakken teǧǧa-t tallit di zzman-a deg-i d-negra. Zik, amedyaz yuɣ amḍiq amuqran di tmeṭṭi-nneɣ. Ḥemmlen ad as-slen medden, ḥemmlen awal-is ibennu s tmeɣrut iweznen. Ttwasnen, yeqqim-d yisem-nsen, yeqqim-d wawal-nsen d inzan ttalsen-asen medden yal mi ara ten-iḥwiǧen.
Ula d ass-a, aṭas n yimedyazen i d-yufraren, yuli uswir-nsen, maca ur ten-ssinen ara medden. Aṭas nettwali-ten, nesla s yessen ufraren-d di tfaskiwin d-yettilin di yal tama di tmurt-nneɣ. Maca anagar imedyazen ara yecfun ɣef yisem-is, mi d-yeffeɣ syinna ad yerbu wakal.
Tagara-ya, aṭas n yimedyazen i ḍefren abrid n tmedyezt s tmenna, am wakken tella zik-nni, acku, tuget, asefru ḥemmlen ad as-slen yimdanen d timesliwt wala ma ɣrant deg yidlisen. Yerna izen yettɛeddi akken iwata s tmenna, yettḥaz aṭas…
Yerna amedyaz ttissinent yimdanen.
IZIRAN d yiwen gar imedyazen n tallit-a i ifernen abrid-a n ususru n tmedyezt-ines i yura, akken ad yesɛeddi izen-ines akken iwata. Ussan-a yezrin, yessekles yiwet n tezdemt n 10 n yisefra yeddel s uẓawan.
Gar isentalen ara d-naf di tezdemt-a, tayri n sin yemsaḥmalen, Tayri-w, d asefru n usirem, icudden ulawen, d asefru yeččuren d tidet, yeččuren d afrayen. D tayri zeddigen anda ad d-naf argaz yeqqar-as srid i tmeṭṭut-is ayen yellan deg wul-is :
Mazal-iyi ḥemmleɣ-kem
Mazal ad kem-ḥemmleɣ
D awezɣi ad beddleɣ udem
D awezɣi ad kem-beddleɣ
Timerja, aṭas n yilmeẓyen iwumi teḍra akka, aṭas i yettraǧun ad idiren tayri-nsen, maca yebḍa-ten zzman. Deg usefru-ya ad nefhem belli sin yilmeẓiyen-a yebḍa-ten yilel, ur zmiren ara ad mlilen xas akken mm-yeḥmalen. Taqcict tunag, tezger ilel, aqcic yeqqim di tmurt yettraǧu. Aqcic yugad ad teǧǧ tinna iḥemmel :
Di tuggdi yessawalen i layas
Ugadeɣ ad iyi-d-tḥuddeḍ tilas
Ugadeɣ ad aɣ-ssedhun wussan
Ugadeɣ ad aɣ-ikellex zzman
Ugadeɣ zzher-iw ad yefk afus
Waḥd-i ad mmteɣ d ameḥbus
Tenna-yid, d asefru n leqher, n uɛetteb, deg-s ad nefhem belli taqcict tḥemmel s tisselbi aqcic, maca aqcic-nni tḥemmel ur yesɛi ara afrayen ar ɣur-s. Ad nefhem belli taqcict tettḥawat deg-s akken ad ilin di sin, aqcic ad yesmeɛẓeg i teɣri-s, ar tagara ad yaf ziɣ ula d netta iḥemmel-itt.
Tenna-id yyaɣ
Yyaɣ ay uzyin
Nekkini qebleɣ
Ad nidir di sin
Aṭas i k-ḥemmleɣ
Ugadeɣ ad selbeɣ
D zzher ttnaɣeɣ
Ur cbiɣ tizyiwin
D sin isefra n usirem, anda amedyaz yessexdem iḥulfan-is akked iferdisen n ugama akken ad yessenfali tayri s tugniwin.
Lukan i lliɣ d abeḥri
Ad as-slufeɣ i wudem-im
S leḥnana akked tayri
Ad d-ssakiɣ afrayen-im
Nezmer ad tenṣennef ar tmedyezt tasnazmulit. Amedyaz yenna-d ayen yebɣa s izamulen s tugniwin :
Steqseɣ ccetwa
D waḍu mi yerfa
Steqseɣ lehwa
Ma mazal tecfa ?
Steqseɣ uḍan
D wid-ak i aɣ-yewḍan
Steqsayeɣ ussan
I aɣ-d-yeǧǧan iɣisan
Asḥissef, ndama, lexdeɛ, deg usefru Asḥissef aya daɣen ur t-yezgil ara ur t-yezgil ara, neggra-d di zzman ulac deg-s laman. Yeqwa lexdeɛ, win ara teɛiwneḍ mi yewweḍ lebɣi-s ad yettɣewwel fell-ak. Ad yali fell-ak, ad yenker lxir-ik. Ad ak-d-yekk s deffir :
Ay aḍar melmi ara naweḍ ?
Neɣ ahat ur nettaweḍ
Wid akk iwumi afus
Fkan deg-i afus
Ad naf diɣ tamsalt n yinig, s wudem n wass-a, deg usefru Inig, War axxam akked Axxam n yiminig. Inig d tadyant iḥuzan tuget n yilmeẓyen n wass-a, bɣan akk ad inigen, ad fɣen tamurt. D acu kan deg usefru ad nefhem, amedyaz icudd aṭas ar tmurt-is d wayen akk i yeǧǧa sdeffir-es, yal amkan, yal akud yuɣal-as d tujma :
Ǧǧiɣ tafat n yiṭij-iw
Tinna iyi-tteggen ifadden
Asigna yeddel zzher-iw
Itri-w ur tẓarrent wallen
Kumseɣ aktayen n temẓi-w
Snagareɣ deg yimeṭṭawen
Yemmeslay-d amek d wacḥal i yuɛar yinig. Acḥal d-yewwḍen ar ɣur-s yufa-d iman-is d agujil mebla lwali. Wid akk as-ireggmen, wid akk i ɣef yettkel. Deg yinig, ulac xali-k di tessirt, yal wa yekkat amek ara isellek iman-is. Acḥal iwumi xerbent tirga :
Walaɣ-t yeṭṭes
Idis n ubrid
Asemmiḍ deg-s iteqqes
Nnda ad t-tessirid
Yenɣa-t usemmiḍ
Yuɣal d azegzaw
Isenned ar lḥiḍ
Iseffeḍ tirtaw
Yewwi-d ula ɣef taluft n yiminig ma ifat meqqar yuɣal d amɣar, amek teḍra yid-s. Aṭas iwumi teḍra akken. Ad bnun ixammen akken ad kken nnig wiyaḍ, tagara ulac wid ara ten-izedɣen. Dderya-nsen ur uɣalen ara, yal wa yedder anda nniḍen, netta ikemmel tudert-is d aɣrib di tmurt-is:
D axxam n uɣrib
Tuɣaleḍ d axrib
Ala igerfiwen
I ak-yeddawaren
Nekk ass-a uḍneɣ
Ur ttnekkareɣ
Di sbitar ar wayeḍ
Tarwiḥt tettwaweḍ
Ad d-naf tadyant n berru, tin yeṭṭuqten tagara-ya di tmetti-nneɣ, ama deg yinig, ama di tmurt, deg usefru Anef-as, amedyaz yules-d yiwet n tedyant n sin anda argaz yuɛar, ireffu bih-fih, nettat kifkif. Tameṭṭut n wass-a, ur tṣebber ara sdat urgaz-is, awal sin d ccwal. Aṭṭan-a yuɣ aṭas n yixxamen, yessegra-d deffir-es aṭas inebran, aṭas yigerdan i yettidiren di tlemmast n tiggujet n baba-s akked yemma-s :
Ma ulac, yid-s fru
Akken ad tethennim di sin
Ttawil aneggaru, d berru
Ma ulac ad d-ḍrunt texnanasin
Yelha, ula d beṭṭu d tifrat
Ur ttxemmim ara ar temrart
Akken ad tethennim di sin
Ur d-ḍerrunt texnanasin
D tazdemt n yisefra ara naf di snesla n YouTube ( Iziran officiel ):
IZIRAN – Axxam n yiminig / poésie kabyle contemporaine sous-titrée 9/10 (youtube.com)
Fahim MESƐUDEN
