Zik, mi tella Fransa da, yiwen ufellaḥ n Udrar n Sidi Yidir, tama n yIlmayen, iruḥ ad iceyyed ɣer wAεraben, ɣer tama n Medjana.
Iεedda ɣef yiwen umkan yufa afrux n tsedda. Ijmeε-it, iger-it deg usgers, ikemmel abrid-is. Deg ubrid mi itteddu, seqsan-t-id medden d acu i yellan deg usgers-nni, yenna-asen : « d aydi ».
Mi yuweṭ ɣer umkan ɣer i iruḥ, win i t-yesesqsan, d ayen i asen-yenna i yimezwura i imugger deg ubrid i asen-yenna i wid yufa din : « d aydi ». Deg tuɣalin, mi i fuk ccɣel-is, yekka-d ɣef Lkumisaṛ, yefka-as afrux-nni n tsedda. Yefreḥ nezzeh Lkumisaṛ-nni, ur yeǧǧi ara amexluq-nni ad yeqqel akken s ifassen-is. Yefka-as idrimen, yeččur-as iculliṭen d irden, lqahwa, ssker…yerna-as lhayca ɣef ara iεebbi ayen i as-yefka. Widak i t-yeẓran din ssawṭen lexbeṛ i Lqayed n It Ḥalla. S lɣiṭ d ufeqqiε i iceyyeε ɣur-s akken ad meẓren, ad t-ilawem i wacu mačči i Lqayed i yuwi afrux-nni n tsedda. Iruḥ ufellaḥ-nni ɣer Lqayed, yeseqsa-t-id:
– Sliɣ tufiṭ afrux n tsedda, tuwiṭ-t i Lkumisaṛ…
– D tidet, yella wakka. I as-yerra.
– I wacu ur iyi-t-id-tuwiṭ ara i nekk?
– Ukan uwiɣ-ak-t-id i kečč, ad iyi-d-tiniṭ « SAḤIT ». Ma tesla tsedda yenza ufrux-is s “SAḤIT”, ur tettεawad ara ad tarew!
El Hadi Bella
