Igduden n ddunit meṛṛa, mara d-yaweḍ yiḍ aneggaru n dujember, umnen dakken azekka-nni, amenzu n yennayer ad yif aseggas yezrin. Ma da ɣrneɣ, win testeqsaḍ ad ak-yin : ttif iḍelli, ass-a. Aya, mačči d awal kan : d tidet i nettidir. Ɣas akken texnez, d « lwaǧeb asirem ad yili ». Aseggas amerbuḥ i wid akked tid mazal bedden.
Aseggas ameggaz : Werǧin yuzel « Aseggas ameggaz !» deg yimawen n yIzzayriyen am yennayer-a. Ula d aqerḍal n yiserdasen yesserbeḥ i tegduda : aseggas ameggaz ! A rbeḥ, a tafat.
Aɣerbaz : Mazla-it ballottage gar uqamis d ugennur. Ɣas akken, llan widen i d as-imenɛen.
Aɣmis : Ay asmi terɛeḍ ur tewwit.
Bouamara Kamal : Yesnerna tamkerḍit s tamaziɣt s Issin, asegzawal amenzu d-yelhan taqbaylit s teqbaylit. Ɣas yeffeɣ usdawan lantrit, ur yeffiɣ ara taqbaylit. Dɣa, yerna-d Issin wis sin, deg useggas-a yezrin. Waqila, ttif lantrit akken tenfeɛ tamaziɣt.
Djoher Amhis : Yennayer-a, tessaweḍ 97 n yiseggasen di leɛmer-is. Tudert-is meṛṛa deg wannar n tsekla akked win n uselmed. Tessufeɣ-d acḥal d « adlis n tɣuri » n ungalen n yimyura izzayriyen am : Le Prix de l’honneur ( taɣuri n Le Grain dans la meule n Malek Ouary), D’une rive à l’autre (taɣuri n La Terre et le Sang akked Les Chemins qui montent n Mouloud Feraoun), Taɛssast (taɣuri n La Colline oubliée n Mouloud Mammer).
HCA : tella tedrimt, yella lebɣi…ulac tazmert (pouvoir). Iḍelli di Timimoun , ttunefken warrazen n Le Prix du Président i widen d-yufraren. Yella-d daɣen yiwen n cɣel…dayen kan : urant suluṭat lmaḥelliya l fronton n baladiyat Timimun, s tmaziɣt, s yisekkilen n tfinaɣ.
Iname Beyoud : ungal-is Houwaria, d-yefɣqen aseggas yezrin, yewwi arraz Assia Djebar. Ma d nettat, sserwan-as rregmatwidak akked tidak tezgel tsekla, widak d tidak i yugin ad qablen lemri ad walins tidet amek-iten(t) Yennayer. Lemri-nni d Houwariya i yeksen ɛeryan i tmeti.
Lyès Belaidi : Am Itri d Tilelli, ula d netta iger iman-is deg wannar n tsekla. Yura yakan Yezger asaka, ungal i d aɣ-yewwin ad necali di Tefriqt n wadda. Yella-d, netta d yimeddukal-is, d lmendad n tesɣunt Aselmad.
Mohand Akli Salhi : Mbaɛd gar tiṭ d yileḍ d-yewwin arraz Assia Djebar, yuɣal-d usdawan s Tibratin, ungal-is wis sin d-yefɣen di 2974. Tira n Mohand Akli Salhi teffeɣ i le chemin battu, temmal-d iberdan nniḍen, iberdan yezzin s weɛrur le groupe, l’autoglorification akked littérairement correct.
Nedjmeddine Mouaissi : Mi yemmeɣ ɣef pizza carré, yečča-tt, ad as-yeqqim Itri i tira akked tɣuri . Yessuqel-d yakan Charlie et la chocolaterie, ungal n Roald Dahl. Aseggas-a yezrin yessufeɣ-d Tibdar, d amud n tenfaliyin i d-yelqeḍ seg wayen yeɣra. Mazal ad as-d-yernu i temkerḍit.
Tilelli Bellal : D taqcict-nni yeselmaden taqbaylit i les Chinois. Mbaɛd ungal-is Tezgertiraga, tuɣal-aɣ s Iceqfan amud n tullisin d-yefɣen aseggas yezrin. Tilelli Bellal seg gar yilmeẓyen d telmeẓyin iɣef ara tettkel tmaziɣt.
Tasdawit n Bgayet : Uf, tezgel-itt slaṭ nbi n zawiya ! aseggas-a telli tiwwura-s café littéraire ara yesemlilen anelmad d umaru (n yal tutlayt). Inebgi-s amezwaru d Meksem Zahir.
Tafsut : Tafsut n useggas yezrin teɣunza 20 di yebrir.
Taneɣlaft n yidles : Anwa ? Acu ? Amek ?
Tilibizyu : Tif-itt asmi tella noir et blanc.
Tighilt Rachid : Yettwamlek urgaz-agi. Yesdukel taẓuri d tsekla, rnu mačči d awal kan. Aseggas-a yezrin i cebbeḥ-d tamkerḍit taqbaylit s Tawkilt tamcumt, d yiwen n ssenf n tsekla ur tessin tmaziɣt. Tira-s neɣ tisuqqilin n yisura i ixeddem jebbdent am dkir. Ɣas raǧut-t, ur yettɛeṭṭil ara ad aɣ-yessibnin taɣuri.
Yennayer : Mazal-it deg sebɛa isufar akked yijeqḍuren.
Yiwen wass : Yiwen wass ad yerfu usefru di mkul awalad d-yeddu : tfuh !
Tahar Ould Amar
