Ma nebder-d amezgun i γ-ittekksen anezgum, neγ asefru i nessummut d ferru i γ-yettawin γer tsekla-nni-nneγ i γ-d-yettaken tudert nniḍen war ma neḥṣa s wadeg d wakud, ad nerr tiṭ srid γer umeγnas yessaγen tiftilin tiseklanin n teqbaylit, Ğamal Benεuf (Awetniri Awlawal). Yella-d d aεeggal d imesbeddi n tdukkla Numidya deg Wihran… γer tama n umeγnas ameqqran n tmaziγt, Σebḍella Ḥaman (1936-2018), iγsan-is di talwit.
Ma neγza ddaw n tγuzi neγ ma nuffeg nnig n waffug… ur d timussniwin «tiṛumiyin» tisdawanin i γ-gan d timsirin timeγradanin i d tasledṭ taḥeqqanit taseklant tamedyazant. Amzun akken s yiwet n tsarut ara neldi tiwwura n yal axxam, tiwwura n tal tasekla γas tezga d timawt…
Tessufeγ-iyi akkin… tukkist-a n Timlilit n tγermiwin:
«Yidir am win i d-yendekwalen, neγ am win i d-yeffγen seg wanu lqayen, yerra-d nnehta meqqret: i nekk tura imi tt-ṭṭfeγ di ẓẓmik – wa yesεa, wa yettqemmir, wayeḍ ur ẓriγ acu i yessexdam, d acu i yi-tuqeε deg medden? Meḥsub kfiγ tid-iw, imi ara kseγ tiγeṭṭen n medden… Maca, aṭṭan γas trewleḍ-as, ma iḥuza wiyaḍ, a k-t-id-sneṭḍen. Ah… ya ddin qessam, nuγal yak d inekkiyen!»
Yidir, da : yeffeγ adeg, yeffeγ-it wakud. Yeffeγ-d seg wanu lqayen, ur yeẓri anda ksan wuccanen; takudegt (diégèse) teffeγ ul n wallaγ-is semmḍen. U dγa terza-d tehregt nniγ :
Tekksem-iyi adeg-inu
Briγ i wakud-nwen;
D acu-kem a takudegt?
Talsa tettwagzer tejla
Takurt i tgam d ameγrad!
Ffγeγ amğux aberkan…
Tarusi n wungal… tekkes-aγ aγbel γef:
Amek akka a Yidir?
Tgerrez ddunit tura mi d-tuγal Tudert a Sirem!
Awi-d ukan ma d iγsan… ara kun-yesdakklen:
«Iṣubb-d si taffa-nni n wulzuz iγef yeẓẓel, mẓuγaren afus deg ufus, netta d Tudert, ulin ad merrḥen di temdint Timlilit n tγermiwin
Tafat… akkin i tallast
Awal yeffeγ «takudegt»
Nessader «Yidir» «Tudert»
D ulawen d timyigert
Nemmut nurga nuγal-d
D Timlilit n tγermiwin …
