Ddurt-agi, yella wayen i ibeddlen di Tmurt n Wis d Acu-tt. Tettban-d am akken tennecraḥ ugar. Acmumeḥ yezgga deg udemawen n wid akked tid d-ttemliliɣ. Syin ar da, ad sleɣ i uskexkex. Ttqerribeɣ s anda akken d-yekka, almi i d iyi-d-yeḍher wegraw n yirgazen akked tlawin zzin i yiwen, ttḥessisen-as. Qarbeɣ, ɛeqleɣ kra seg-sen : Budinar (d netta i yettmeslayen), Ḥamdan, Nuṛ, Ɛun, Ait Muḥend, Celmuni, Nekkar akked Murad. Meṛṛa si tsuta d tamezwarut n yiselmaden n tmaziɣt. Si tzemmurt ar tayeḍ tettwaɛelleq « bannière » yura deg-s : « Tamaziɣt gar tlelli d ujerrid n tuqqna».
Iwala-yi-d Nuṛ, yecmumeḥ.
Nur : almi d ass-a ara d-terzuḍ ɣur-neɣ. Nezga neqqar-as : i tangalt-a milmi ara d-truḥ ?
Budinar : Tettwaxeṭṭaḍ a Tangalt. Nurǧa-kem acḥal aya. Mais bon, aql-akem da, ansuf yis-m.
Tangalt : Ula d nekk, yal tikkelt ara d-aseɣ, ttarameɣ ad kun-mlileɣ. Ini-d a Mhenna, wahi mačči d Melab ?
Budinar : D netta, d Murad. Send iḍelli i d-yewweḍ.
Tangalt : yeǧǧa-yaɣ-d leḥzen.
Murad : ula d nekk ḥezneɣ acemma imi kun-ǧǧiɣ. Maɛna, akken twalaḍ, ufiɣ-d di Tmurt-a n Wis d Acu-tt, widak ḥemleɣ. Rnu, ulac aṭan. D tazmert n tzemmurt.
Ḥamdan : kkes aɣbel a Tangalt. Ulac ara yaɣen Murad. S kra n win d-ikecmen Tamurt-a n Wis D acu-tt yufa talwit i lebda
Tangalt : D acu-t unejmuɛ-a ?
Budinar : d séminaire.
Tangalt : Amek ? Ur teɛyam ara sg ujerrid n tuqqna akked « bilan et perspectives » ?
Nuṛ : lukan nettaf add-nelhu d wayen nniḍen. Maca, ur d aɣ-yeɛǧib ara wakken i tuɣalem di Tmurt. D agrireb. Simmal ɣer deffir. Tserḥem i ṭbel deg waman.
Budinar : dɣa, nenna-as (imi neẓra ad d-yas wass ideg ara nemlil) ad d-nheyyi cwiṭ n cɣel ara inefɛen tamaziɣt, ad t-tawiḍ yid-m.
Tangalt : ass-a tamaziɣt tella di tilibizyu, di rradyuwat. Tesɛa HCA, tesɛa Cneplet, tesɛa takadimit ‘xersum di lkaɣeḍ),Tettuselmed deg iɣerbazen, di tesdawiyin.
Nuṛ : d ta i tawaɣit : teckunṭḍem deg ujerrid n tuqqna, tennam-as ifuk Rebbi lḥif.
Tangalt : amek ?
Ait Mohand : d acu-tt tmaziɣt-a ur nettnaḍaḥ ara ɣef tlelli akked Tugdut.
Ḥamdan : d tidet. Tamaziɣt ur nemmal ara tafat akked webrid n tifrat, ur nelteddi ara tiwwura n leḥbas, ur yettḥraben ara ɣef wawal ilelli, ur neggar ara asurif deg umaḍal…, yif-itt fihel.
Nuṛ : ih, axir fiḥel. Tesserwam-aɣ tijmilin ur nemɛin. Yenṭeḍ-ikun ujeǧǧiḍ n yineɣḍimen : tesnulfam-d les anciens moudjahidin n tsertit, n tmaziɣt, n larac, n tefsut… dɣa teqqim-m kan din.
Tangalt : Ihuh anect-a akk i… ?
Budinar : ih anect-a akk. Mais la bonne nouvelle est que ça se soigne.
Nur : asmi ara d-uɣaleḍ, ad d-tafeḍ n heyya iwellihen ad ten-tawiḍ yid-im i… i amek akken a Mhenna ?
Budinar : i…wat laxart neǧǧa-n di Tmurt (agraw yettkexkix d taḍsa).
Ḥamdan : ur reffu ara a Tangalt. D anecraḥ i yettencraḥ Mhenna, yakk tesneḍ-t.
Tangalt : sneɣ-t, sneɣ-kun meṛṛa, ḥemleɣ-kun meṛṛa. Atan ihi ad d-uɣaleɣ asmi ara tfakem séminaire-a.
Nur : ar tayeḍ a Tangalt. Siweḍ-as slma i Samyia d tiniḍ-as belli je sui fier d’elle.
Yemlal-iten Tahar Ould Amar
