Ddurt-a, rziɣ daɣen iman-iw deg Amkan n Wis d Acu-t. Rnu, mačči ar din i d as-nniɣ ad ruḥeɣ : nwiɣ ad aliɣ s adrar, ɣer taddart ad merḥeɣ akked imedyazen i tili n tmeddit ddaw uḥanu n tejmaɛt. Maca, ajajiḥ n tmest yuɣin din yessexreb-aɣ amerreḥ. Dɣa, afeɣ-d iman-iw deg Umkan n wis d acu-t.
Din, tezga tegnawt tetteddu di lebɣi. Ur semmeḍ ur yeḥmi lḥal. D tafsut ṭul useggas. Tedduɣ, akken i yuɣeɣ tannumi, deg ubrid yettawin ɣer yiwen n ubeṭeḥḍaḥ iɛum d imɣan, almi i d iyi-iḍheṛ yiwen ugraw n tlawin d yirgazen ddaw n yiwet n teslent anect-il-a-tt. Qerbeɣ, sliɣ : « Gguleɣ seg Umkan n wis d acu-t armi Akfadu /Ur ḥkimen deg-i akken llan/ Ur nettruẓ, ur nkennu/ Ulac d aɛwessu, mara nekkes nnubi i yimeɛfan ». Rniɣ qerbeɣ ugar, ɛeqleɣ Si Mḥend Umḥend, xas ur sineɣ ara udem-is.
Tangalt : Azul a… ccix… a dda Si Mḥend Umḥend
S.M.U : Σeslam-a a sser ! Tcebbḥeḍ-d abeṭeḥḍaḥ a tasekkurt. Qerreb-d…
Tangalt :I ferḥeɣ imi k-mmlaleɣ
S.M.U : Ad tezreḍ nekk. Aṭaṣ aya ur ssefraɣ. Ass-a, tu vas m’inspirer mačči d kra !
Tangalt : Atan theḍḍreḍ tarumit a dda Si Mḥend Umḥend. Ur nwiɣ ara.
S.M.U : Nhedder meṛṛa timeslayin deg umkan-a. Hedreɣ taglizit, tasbenyulit ula tameslayt n Cinwa heddreɣ-tt. Dagi ulac aɣbel n communication. Ḥala kunwi i d iɛeggunen.
Tangalt : D tidet, ẓriɣ aya d tatut kan i ttuɣ. Amek telliḍ, ur tejjimeḍ ara tamurt.
S.M.U : Ur diyi-yuɣ wara. Ulac i d aɣ-ixussen. Da acu tikwal ttxaqeɣ mara d–mmektiɣ taddart akked «w asmi akken i lliɣ d acwrar/ zin-iw yufrar ». Widen ḥemleɣ meṛṛa da i llan. Nettemlili, am ass-a , nessefruy. Dɣa, tura kan i iruḥ lbaz i izedɣen leḥsin.
Tangalt : Anwa ?
S.M.U : Ccix Muḥend Ulḥusin !
Tangalt : Yyah ! Ad d-uɣaleɣ yiwen wass ad t-ẓreɣ. Mazal-it iferru gar…
S.M.U : Ahya Tangalt tamelḥant, ulac d acu ara yefru dagi. Yerra-tt i lwaɛd usefru.
Tangalt : Inni-yi-d, amek d ak-d-ttbanen imedyazen n tura di Tmurt
S.M.U : D ixlafen ! Ḥemleɣ dayen kan isefra-nnsen. Sbaɛden. Mačči am lǧil-nneɣ, ur neffiɣ ara si « snat n tɣaltin d wezgen » akken dɣa d as-yeqqar Umangellet. Lḥasun ttmeḥsiseɣ aṭas i yimedyazen n tura. Nniɣ-am ifen-aɣ s waṭas. Wali tura Yiwen a Muh Uslmina, i d as-yennan « ḥbes a ddunit, ad rseɣ », yenna-d, ayen d –yenna yeqqaz.
Tangalt : I keč mazal tessefruyeḍ.
S.M.U : Xas inni-d ala. Ttḥessiseɣ aṭas.
Tangalt : Yyah, ur tettaruḍ ara.
S.M.U : Acḥal aya ur d-nniɣ asefru. Maɛna, tikkelt-a «ad d-heggiɣ asefru / mebla ccek ad yelhu/ Tangalt ad t-taru / Ad yeɛǧeb Kiki, Ageswaḥ kan akked Muḥ Usliman »
Yesteqsa-t Tahar Ould Amar
