Tawliwin n tfekka akked tullisin-nniḍen d adlis amaynut n Remḍan Ɛebdenbi. Yeffeɣ-d ɣer tezrigin Imtidad deg useggas-agi (2025).
Adlis-agi d ammud wis krad n tullisin. S sin n wammuden-nni imenza, Timsirin n tudert (Tizrigin Tira, 2010) d Aqcic d yiɣid (Tizrigin Anep, 2013), rnu-as adlis-agi amaynut, yettuneḥsab Ramḍan Ɛebdenbi seg yimura i yuran aṭas tawsit n tullist.
Sdis n yiḍrisen, sbedden ammud n tullisin i wumi yefka bab-is azwel : Tawliwin n tfekka akked tullisin-nniḍen. Iḍrisen-agi, yebḍa-ten umaru ɣef sin. Yal amur deg-s kraḍ n tullisin. Tullisin timezwura, yesdukkel-itent usentel n tfekka. Ameɣri, yezmer ad as-ifaq i beṭṭu-agi yakan seg uzwel n udlis.
Amur amenzu n wammud-agi (kraḍ n tullisin), iwelleh-it umaru ɣer temsalt n tfekka d wamek i tt-tettwali tmuɣli n «uwten». Deg umur wis sin (kraḍ n tullisin nniḍen), yal aḍris s usentel-is ɣas ma yella kra n yinelli i izemren ad t-yezdi d wiyeḍ.
Ayen yellan d amaynut deg tullisin-agi, ur t-yettaf ara umeɣri deg wammuden nniḍen, yerza ama d talɣa n tira ama d isental.
Deg uswir n usentel, amaḍal n tettiknulujit, yettuɣal-d acḥal abrid. Ma deg uswir n talɣa d tɣessa n uḍris, yezmer ad t-iwali umeɣri deg usget n tuɣac deg tsiwelt n teḥkayt. Ɣer-s, yerna umsami n waṭas n talɣiwin n uḍris. Amedya, deg yiwet n tullist, ad yaf umeɣri : aḥric d tasiwelt, aḥric d tabrat, aḥric d adiwenni. Amedya nniḍen : deg tullist tayeḍ yella yinaw ɣef tettiknulujit n tsenselkimt d anternet d «Cloud» (d akufi n yisalen yebnan d aẓeṭṭa, yezmer ad iḍil yiwen fell-asen s anternet), yella uneskin d uneqqis (exposé et rapport) akken yella usebter n uɣmis animan (journal intime).
Ayen i d-yettuɣalen seg uḍris ɣer wayeḍ (di sdis n yiḍrisen) d tasiwelt-nni (narration) ibedden ɣef taɣect n uwadem-anagi : amsawal d awadem i d-yettawin ɣef teḥkayin yedder-itent ; tasiwelt-is di yal taḥkayt tebded ɣef waddud n win igan am unagi yeẓran kullec ɣef yiwudan n teḥkayt i d-iḥekku.
Annect-a, yerra ammud-agi n Ramḍan Ɛebdenbi, yemxalaf ɣef wid i t-id-yezwaren.
Muḥend Akli Salḥi
