I kečč a Muḥed Azwaw d tezzyiwin-ik adlis-a, ad ak-d-yefk yiwen wudem n tmusni, ad ak d-iqqim d tagejdit, ad ak-id-yeţţales ayen gan d wayen nnan imezwura inek. M’ara t-walin medden ammar ad ilin wid ara d ak yinin :
– Tigi d tiḥkayin n zikenni, t-timucuha n Teryel iyess ssedhuyen arrac, i wacu d aɣ nfaant tmucuha n zik, i nekwni s at-tura? Eǧǧ timucuha n zik i yat zik ; nekwni d arraw bbwassa, assa deg irgazen ulin s aggur rsen degs, assa deg isufag semliliyen tamurt ɣer tmurt illan ayda dɣat deg ya n tallit, assa deg yiwet n takurt tezmer ad tzebbwa tamdint tameqqrant deg gwesmenɣer n tiṭ.
In’asen :
– Tamussni tekka nnig teswiεin. Ur ţţilit ar’ay imedhac d arrac issedhac uclawa, ismenyafen arelluc aberreqmuc i yiṭij ireqqen neɣ i wewreɣ yuli uɣebbar.
In’asen :
– Awreɣ yif arelluc, ulac akkw n teqrint garasen: awreɣ kkes-as aɣebbar ad yirriq, arelluc cwiṭ ma icellef it d acellef ad iddegdeg t-ticeqfatin tizraraqin.
In’asen :
– Awer teḍṛu yid-wen ay at-tura am seklu mi gezmen iẓuṛan : di tazzwara zegzaw yifer is, di teswiεt sellaw iḍeṛ. Ttjṛa mebla iẓuṛan leqrar-is t-tamettant. Awer tilim ay at-tura d isekla war iẓuṛan.
In’asen :
-Tamacahut d ajlal n tmusni, kkes ajlal iwakken ad-d-dheṛ temsirt yellan ddawas, acku…
Acku tamussni, ɣas tettabaa lewqat, ur teqqin ɣersen s umrar ur gezzmen lemqas. Si tallit ɣer tayeḍ teţbeddil tussna, tamusni ur teţbeddil ara. Si tallit ar tayeḍ ay geţbeddilen di tmusni d ṣṣifa n sufella, mačči d ixf n daxel.
Maca, taɣawsa tis-snat, a Azwaw, tamusni mačči d lweṛt kan, mačči d agwni mi d-zzin leswaṛ. Awan n tmusni d antag t-tikli ɣer zdat. Ma tgiḍ as algam tenɣiḍ-ţ.
A Azwaw, ur as tegg ar’algam i tmusni. Anida i ţ-issaweḍ lǧehd ufud is tawiḍ-ţ, ma s-aggur eǧǧ tamusni attali s-aggur ; ma s-itran g-as abrid s-itran, ma awan-is d asemḥelleq i-ddunit d wayen illan, anef i tmussni atsemḥilleq i ddunit.
Taɣawsa tis-kraḍ, tamusni, a Azwaw, d asafu.
D asafu n tafat n wurɣu : eǧǧ asafu ad isserɣ ayen irkan, d wayen iblan, d wayen ur nesεi iẓuṛan. G-as-d asaber yef-fayen ilhan, ɣef-fayen ilḥan deg berdan d amesbrid mačči d amenṭṛan.
Tamusni d asafu : wa yeţţak-it i wa, iwakken a-d-yezg dayem yaala, urǧin yeţţendella neɣ yulwa neɣ iqqim am ɣerrus di tesga.
Ḥeḍṛeɣ yemmut umɣar aneggaru d-iţţawin abrid n tmusni : Nebbwi tafekka-s ɣer uẓekka ideg ara yenṭel. Mi nerr’akal fellas nuɣal-ed, neţmesmuqal am-miṣṛaan la d-iţţakwi. Indel usafu garaneɣ isseg d neţţagwem tafat.
Assen, a Azwaw, i k-id mmektiɣ, i s-nniɣ :
– Ay imaazzan ggibbwas, ɣurwat attuɣalem d ineḥyaf n-kullas si tmusni t-tmuɣli taɣezzfant, t-tulya bbul d laεqel. Mmektiɣ-k-id, mmekktiɣ-d akk tisutwin ara d-immlen. Amusnaw aneggaru nneṭl-it, daa nenṭel yides tamusni? Ulac tijmuyaa d igrawen ideg ara thefḍem tamusni akken ţ-ḥefḍen imezwura nwen. Tura tamusni tuɣal s-idlisen. Degmi y-uriɣ adlis-a i kečč, a Azwaw, d tezzyiwin ik ad ak d-iqqim d tagejdit i-wsenned, d tagejdit i-lebni.
Lmulud At Mɛammer.
