…Lhem d-yennulfan di taddart yesettu Tiɣiltn n Seksu di Yennayer. Rran-t di rrif, lhan-d d waṭṭan d-yeɣlin am siɛqa : tikmamin n waṭṭan akked tidak n leḥkem amesbaṭli i yettaran ɣer lḥebs s kra n win ara t-ixalfen. Lḥasun mačči d yiwet n taluft i yesɣillifen taseqqamut n Tiɣilt Useksut.
Tameddit-nni ideg nnejmaɛen deg wexxam n Sadiya n l’Euro, aḍu, adfel, abruri, raɛdegga ssumlen ddunit. Trisiti yewwi-tt waḍu, aman gersen, l’antenne n Djezzy teɣli-d, timɣarin tekcem-itent tergigit, imɣaren zzalan nnafila… Taddart yefffeɣ-tt leɛqel.
Mi fuken anejmuɛ akked Sadiya n l’Euro, Lbacir akked Belqa ur rrin ara s ixxamen-nnsen: ddarin di Mrutti, qqimen daxel, stufan-d i tkaniḍin n lbira. Ur d asen-d-tuqiɛ ara des igenni yenhewwalen, caxen di tisit. Amecwar akka ters tegnawt. Tafat, wis anisi d-tekka, tga abrid di ṭṭlam. Ineṭeq-d Lbacir: “D acu-t wa a Belqa? Ɛni yuli was?”. D ṭeyara neɣ wis d acu-tt tmacint-nni i d-yesmaren tafat seg ufella. Wis d acu-t-nni yers tama n Marutti. Lbacir d Belqa ggugmen. Yeffeɣ-d si tmacint yiwen n lxelq d aɣezfan am umextaf. « Ya ddin Rebb, d acu-t leɛjeb-a ! » i d- isuɣ Belqa. Leɛjeb-nni ineṭeq-d uqbel ad iqerreb ɣer Lbacir d Belqa:
– Azul fell-awen, ur ttagadut. S talwit i d-ruḥeɣ ɣer taddart-nwen.
– Azuuul ! s-d-rran s tergigit.
– Isem-iw Maz. Ruḥeɣ-d seg planète Ṛa. Ur tt-tesinem ara, acku tamusni-nnwen ur tɛedda ara akkin i Neptune.
– Nek d Belqa, wagi…
– Sneɣ-kun. Tettekkim di lkumiti n taddart Zriɣ milmi d-tlulem, anida d-tlulem. Ur d-ruḥeɣ ara ɣer tmurt n leqbayel, almi ḥsiɣ s anda i tedduɣ. Sneɣ-kun, sneɣ amezruy-nnwen, anaḍeḥ-nnwen, tirga-nnwen.
– Ihuh ! Acu i k-d-yewwin ɣer Tiɣilt n Seksu, Taddart-agi-nneɣ ? Ulac akk deg-s ayen ara yesnefɛen Ṛa, neɣ akka i yisem-is tmurt-nnwen?
Yessefhem-asen ayen i t-id-yewwin ɣer Tmmurt n leqbayel. Mazal-as i planète Ṛa sin neɣ ma d aṭas tlata n leqrun ad tenger. Leɛwam iɛeddan ufan imusnawen-nnsen yiwen uɛeqqar ara yesseḥbibren ɣef tɣerma-nnsen i lebda. Aɛeqqar-a yettili di zit n uzemmur.
– Yah ! Maca acimi d Tiɣilt n Seksu i d-qesdem? Acimi ur truḥem ara ar Ṭalyan, Tunes, Sbanya…anda tella s waṭas zit uzemmur ? Rnu zit n taddart-nneɣ mačči dayen ara kun-iqidden.
– D zit-nwen i ifazen. Ur nettajew ara aṭas.
– Anida tesneḍ awal « ajew », dɣa amek di planète-nnwen theddrem taqbaylit ?
– Di planète-nneɣ ur nesɛi ara aɣbel n tutlayt. Nettemsefham mebla awal. Dagi teqqarem-as télépathie. Akka, tura zriɣ merra ayen ara d-tinim. Mačči ḥala taqbaylit i zemreɣ ad meslayeɣ. Timaziɣin-nwen ttmeslayeɣ-tent, tmmeslayeɣ meṛṛa tutlayin n planète-nnwen.
– Mais amek akka, teqqarem tutlayin n ddunit maṛṛa di lakul ?
– Twalam abrasli-agi I qneɣ…deg-s i llant akk tutlayin. D logiciel akken teqqarem-kunwi. Amek tura, ad iyi-tajwem zzit neɣ ala ?
– Mačči d aɣbel, ilaq kan ad nzer at taddart. Maɛna amek ara Tt-ttxelseḍ, s idinaren neɣ l’euro?
– Ur ten-nesexdam ara di Ṛa. Ad aɣ-tefkem zzit, ad awen-fkeɣ ayen ur d-ttaɣen ara idrimen n ddunit meṛṛa. Neẓra belli Lezzayer, ladɣa tamurt n leqbayel tuɣ-tt deg umezruy-is. Ad d-ǧeɣ yiwet n tmacint, ar kun-yessiwḍen s anda d milmi i tebɣam deg umezruy n Tmurt-nnwen. S yinigen di zman, tezmrem ad tesseɣtim ayen i twalam d taɣyulit.
– Ur tezmirem ara ad aɣ-t-ɛiwnem deg waṭan-agi d-yeɣlin fell-aneɣ?
Ṭahar Ould Amar
