Ur tettili tnekra kan akka, mi tt-yebɣa umdan ad tbeddel fell-as. Tigawt i as-ittakken udem i tnekra, tbeddu seg tegrawla n wawal. D tagrawla n wawal i d takkayt tamezwarut n yal tanekra.
Tinekriwin ibedden ɣef wawalen iqdimen neɣ ɣef wawalen ilmawen ɣerrint deg wussan imenza-nsent, ur ttεeddayent akkin i ubeεzaq n yiḥulfan d tmenna n lebɣi. Tanekra yessufuɣen d tanekra ara d-yesnulfun anamek amaynut. Tanekra ittefɣen d tanekra i ibedden ɣef tegrawla n wawal seg tafrara-s; d tanekra yesmunzuten asezɣen n wawal isebken seg usnunet-is ar twamda-s.
Tafrara n tnekra ihi d aserkem n wawalen i sgersen wussan,. Acku akken ten-sgersen wussan i ten- segrasen ula d nutni. Deg userkem n wawalen igersen, wali d acu i d-iteddun deg yiraggen-nsen… ilefḍan-nni n usbak, fessxen am sbiɣa ideɣlen. lraggen, tagnawt, ttεemmiren-tt, ttuɣalen d asigna, asigna yettibrik, d anza n yigenni mi ara yekres anyir. D ageffur ara d-yeɣlin, d akal ara yerwun, d agama ara yefsun, d tignewt ara yeṣfun, d imɣan ara yekkren, d iɣman ara yersen… amdan, ad yaf iman-is. Akka i d tanekra n wawal, ma yekker-as umdan.
Tikwal, seg tmest inedhen, ttfeggiḍen waman irekmen, ttenɣalen ɣef tmest i ten-iserkamen, sexsayen-tt. Tɣerri tnekra. Acku traε tmest, tendeh nnig wayen issefken. Imir, aman, ma ur ttimsusen ttimriɣen. Akken ula d wawalen n tnekra.
Tikwal, timest yesserkamen, teslalay-d iɣemɣumen n usigna ; mi ara as-yekkes ugug i ugeffur, neǧren iḥumal yettruẓun tilisa, gellun s uzegzaw d uquran, akken i d-sufuɣen iselman n yisaffen i seblaεen iterrasen yessarmen agemmaḍ. Akken ula d tanekra ideg yugar zzεaf ṣṣwab. Tettuɣal d tanekra i d-yettrebbin tuḥsifin.
Tikwal, timest, i d-yeqqimen deg-s ala tirgin ; akken ara tendeh ma suḍen-tt ara texsi ma beṭṭun tirgin-nni. Di tegnit yecban tagi, tiṭ n umdan d lmizan., leḥsab-is akken yebɣa ad t-isufeɣ.
Tanekra ur yellem unamek amaynut, ur tessuffuɣ tirga. Tanekra ibedden ɣef yir awal, tettruẓu i yiman-is targa. Neɣ d acu i tenniḍ ?
Muḥend Akli Salhi
