Tasekla taqbaylit, simmal tettimɣur; di tesmekta n yidlisen naɣ di tewsatin.
Ilmend n teẓrigt tis setta n Ugraw n Udlis i d-tettheyyi Tiddukla tadelsant-tinmettit “Agraw” deg Uzṛu n Cemmini (Bgayet), tella-d tnemselt ɣef tewsit n “Haïku” s teqbaylit, ass n 18 di yulyu 2025 ɣef 14h00.
Tanemselt-a tella-d s lmendad n Massa Ousmer Ferroudja; lal n tekti, akked Lyes Belaidi i d-yefkan tallelt deg usmuzzeɣ n tewsit n “Haïku”.
“Haïku”, d tawsit n tmedyezt di tmurt n Japon. Ijapuniyen, sseqdacen-tt xilla tawsit-a s yisental icudden ɣer ugama; acku d aɣref yeqqnen nezzeh ɣer twennaḍt i as-d-yezzin. Ayen yessemgirden tawsit-a ɣef tiyaḍ, d talɣa-s. “Haïku”, d asefru yesɛan anagar 3 n wafiren. Afiren-a, yessefk ad sɛun tunṭiqin akka: afir amezwaru 5, afir wis sin 7, afir wis tlata 5. Nnig n waya, mačči ccerṭ ad yesɛu tameɣrut. Deg tnemselt d-yellan deg Ugraw n udlis, taẓrigt tis setta, kkin azal n 10 n yiɛeggalen.
Akken ma llan teɛjeb-asen tewsit-a, d aya i d-yeglan s ufares sɣur yal yiwen d yiwet.
Ad d-nefk kra n yimedyaten i d-sekren yiɛeggalen yekkin di tnemselt:
Yessa umellal
Suɣeɣ-d, ferḥen-iyi
Duǧember luleɣ (Romy. B)
*
Yesseɛseɛ yiṭij
Yesseḥma zzḍec abendir
Ččlebḍeɣ di temda (T. Belaid)
*
Chaleur éclatante
Un atelier de haïku
Belaïd s’en va (O. Ferroudja)
*
Iṭij yeflali-d
D imura zhan, ḍsan
Agraw ilmendad (R. Faïza)
*
Agris d inebgi
Imeɣban yenɣa-ten laẓ
Igelliden sagren (T. Maziɣ)
*
Yettsuḍu waḍu
Am trabuzt uḥeddad
Yerfed tikta-w (B. Lyes)
Nedjmeddine Mouaissi
