Tinhinan Ḥarceb tlul ass n 15 yennayer 2008, deg taddart n Bujlil (Irjen, Larebɛa Nat Yiraten). D tanelmadt deg useggas wis kraḍ deg tezrawt n usegmi d tdamsa deg tesnawit Xewwas Ḥsen di Larebɛa n At Yiraten. Tella ɣef uqerru n Ugraw Adelsan n Tmedyezt deg Tiddukkla Tadelsant Amezyab n Lehna n taddart-is. Tebda tira n tmedyezt mi tesɛa 10 n yiseggasen, deg 07 meɣres 2018.
Asirem n tmedyazt d adlis n tmedyazt n 38 n yisefra i d-yettmeslayen ɣef wayen nettidir deg tmetti d wayen nettḥulfu s wulawen-nneɣ, rnu ayen i nḥemmel deg tudert-nneɣ.
Telmed-d tmedyazt ɣer Ccix Muḥend Ulḥusin, nekkni nelmed-d seg-s. Tefka-aɣ-d iwellihen d temsirin yelhan, yerna tesqerreb-aɣ-d ansayen d yirmad n tmetti tamaziɣt, tesken-aɣ-d laṣel-nneɣ s zzux d lferḥ.
Tuget n yisental i yellan deg udlis-a d iqburen, acku temmeslay-aɣ-d ɣef wayen yellan n zik am yennayer, lejdud, taddart n zik… akken i d-temmeslay ɣef tira: tira n usefru d ddwa, ad nebdu asefru, tamedyezt… war ma tettu tarbaɛt n “Jsk”.
Adlis-a, d adlis yelhan mliḥ, acku yettmeslay-d ɣef usirem n tmedyazt d wamek i tezmer ad terr amdan. Aɣanib-is yeččur d iḥulfan akked lemḥibba n twacult d tmurt d tmaziɣt.Tukkist seg yisefra-s:
A yemma a tin ɛzizen
A tin yesɛan ul ḥninen
Mi ara tettaḍsaḍ ad as-tiniḍ d tiziri deg yigenni
Am udfel n udrar ɛlayen
Am waman n tala zeddigen
Tutlayt n tmarut d tafsast cwiṭ axaṭer tessemres xilla n wawalen isehlen i lefhama, amedya: imma, taddart, aɣerbaz…
Cihab MEḤǦUBI
Anelmad n useggas wis sin di tesnawit Hucer Mulud (Ɛin Legraǧ)
AZZIḌRIS:
Azwel: Asirem n tmedyazt
Ameskar: Tinhinan Ḥarceb
Tawsit: tamedyezt
Tiẓrigin d useggas n usiẓreg: Ccix Muḥend Ulḥusin, yulyu 2024
Isebtar: 59, bḍan ɣef 38 n yisefra
