Imeɣriyen n tsekla tamaziɣ s tumert i muggren tuffɣa n wungal amaynut Tadist yettwaneɛlen n Zohra Aoudia, tazwara n useggas-a n 2023, ar tiẓrigin Imtidad. Deg ungal-is amezwaru Tiziri (Tiẓrigin Achab, 2021), yedda-d yizir n Tadist yettwaneɛlen.
«Akken kan i d-terba, rruḥ-is yettali yettsubbu, iban kan akka ur tettidir ara; aṭas i temmenṭer, texnunes, teqqim i ccer, tnuda talqimt deg yiḍumman, tedda ḥafi, tensa berra i usemmiḍ i igezzmen iɣes…» (Sb. 17 )
S wawalen-a imenza n wungal, Zuhra tules-aɣ-d tadyant tuḥzint n Razan. Taqcict tasurit n 15 n yiseggasen i yuɣalen d taɣawsa n tuzzuft gar yifassen n baba-s, almi d asmi i terfed s tadist. Yuggad ad yeffeɣ wawal, ad slen medden dɣa ibges ad tt-ineɣ ad yemḍel lɛar-is. Tacmatt i yezreɛ netta s ufus-is.
Razan asmi teḥsa dacu i tt-yettrajun, terwel-d seg uxxam, tedda d terbaɛt n Yisuriyen irewlen si tmurt-nsen tcewwel tegrawla, unagen ad nadin cwiṭ n talwit di tmura-nniḍen. Tawenza-s tesres-itt di Tmurt n Leqbayel, di Tizi Wezzu anda tedder yir tudert gar umenṭer d lḥif d laẓ almi d asmi i tt-id-uwten yibuccaqen n tarrawt.
Tilawin akk ferrḥent mi ara ilal ɣur-sent llufan, maca Razan tɣunza-t, tɣunza tadist-is i tt-id-yesmektayen s lweḥc n baba-s i t-ixelqen deg-s mebla lebɣi-s. Gar usḥissef d lqerḥ, tameɣbunt tessuffeɣ tarwiḥt akken kan i d-tlul yelli-s Damya.
«Amek i tebɣiḍ ad ḥennceɣ ɣer yidmaren-iw taqcict i d-ǧǧiɣ mebla lebɣi-w? Amek ara as-siwleɣ a yelli neɣ a weltma? Seg wurfan tesguḥḥu trennu, tikkufta ffɣent-d seg yimi, lxiḍ arqaq i tt-icerken d tudert yeqqers, lamana tuweḍ bab-is. » (Sb. 37 )
Deg yixef wis sin d asawen, tanallast tekcem deg teqsiḍt n Damya, i d-yeggran deg uxxam n yigujilen. Niqal tebɣa tmejjayt n tnefsit ad tt-tawi, maca yugi-as urgaz-is. Di taggara, tuwi-tt twacult n Yifesganen, rebban-tt amzun d yelli-tsen. Asmi i tesmed 18-is n yiseggasen, ḥkan-as tidet ɣef yemma-s d wayen akk i tesɛedda.
Damya tuwi-d lbak, tkemmel almad-is armi d-teffeɣ d taneɣmast anda txeddem deg Tamurt ass-a. Gar tudert d uxeddim, terna-yas-d teqsiḍt n tayri d Silas i yuɣalen d argaz-is. Maca yir tawenza, tessuffeɣ-as tirga mxalfa, acku s kra n tudert iggerzen gar-asen, Silas texser ṭṭbiɛa-s, yuɣ-itent deg wallaɣ-is almi ur yeẓri dacu i ixeddem. Yiwwas kan yerfa, yerfed ajenwi isukk-it deg tfekka taleqqaqt n tmeṭṭut-is Damya.
D amsestan (enqueteur) Dawdi Karim i yufan deg leqjer n texxamt n Damya azmam-is abḍni ideg tura taqsiḍt-is d teqsiḍt n yemma-s Razan i wumi tsemma: Tadist yettwaneɛlen. Aseggas d uzgen tamettant-is, akken ad as-yerr tajmilt, yessuffeɣ-itt-id d ungal.
Ungal-a n Zuhra yesken-d yiwen wudem uffir n tmetti taqbaylit i yerzan igerdan i d-yettlalen mebla imawlan, i yettawwin ɣer uxxam n yigujilen. Tamarut tesḥassef aṭas ɣef yimawlan i wumi teqqur tasa, almi ttsemmiḥen deg tecriḥin-nsen. D acu n ddnub i yesɛa ugrud imi ara ixelles tuccḍa n yimawlan-is?
«Yal aseggas ttlalen-d azal n 45000* d llufan i ttaǧǧan yimawlan deg tmurt n Lezzayer, tuget deg-sen seɛɛun-ten-id berra n sbiṭarat. Seg wakken aṭas yid-sen, dduḥat-nsen msennaden wa ɣer wa ad as-tiniḍ yal yiwen deg-sen yettnadi tabɣest ɣer gma-s. » (Sb. 41)
Nnig n taluft-a n yigujilen, Tadist yettwaneɛlen, isebgen-d lɛeqliya d yir axemmem i n tmetti i yettwalin igerdan s war imawlan ur nefri s yir tamuɣli. Ḥeqqren-ten, ttlaqaben-ten s yir ismawen i wumi ur yezmir umeẓẓuɣ ad isel. Ula d irgazen ur nettarew ara, smenyifen ad tenger tara-nsen wala ad d-awin kra n ugrud deg uxxam n yigujilen akken ad t-id-rebbin. Annect-a iban-d deg urgaz n tmejjayt n tnefsit i yebɣan ad d-tawi Damya ad tt-terr d yelli-s s lqela n tarwa; maca argaz-is iɣunza taqcict-a imi d yelli-s n ubrid. Yuggad ɣef nnif-is, ur iḥezzeb i tara-s yeqquren.
«A Ferḥat, bɣiɣ ad d-nawi yiwet n teqrurt ad tt-nrebbi am yelli-tneɣ, seg uxxam n yigujilen. Ḥeḍreɣ i tlalit-is, yemma-s temmut sdat-i, tegzem tasa-w…
Mazal ur d-tekkfi ara ameslay, argaz yuffeg ɣer yigenni, yuɣal-d ɣer lqaɛa:
“Acu-t !! Yeffeɣ-ikem leɛqel, d aḥḍiḍ tura i yi-d-yeqqimen ad as-muddeɣ isem-iw, wissen akk anda tefka yemma-s, sulin-as-d aɛebbuḍ, nekk tura ad ssreɣ yelli-s, ala tagi ur d-nḍerru ara. Nekk d mmi-s n Uleɛmara, ccetla n nnif d lḥerma…» (Sb. 44 )
Zohra Aoudia i yettwassnen s uɣanib-is n tira tuntit (écriture féminine), ur tezgil ara tamsalt-a n tlawin deg wungal-a wis sin. Asentel-a yuɣal-d xas ulamma mačči s telqay, maca yettbini-d yufrar i wudem n tmeṭṭut, akken ad tt-id-yesmekti s wazal-is n Tmeṭṭut deg tmetti, akken tebɣu tili; tbedd neɣ teɣli, tressa neɣ tulwa, ad teqqim d tameṭṭut tafeḥlit, ur tkennu ara sdat n urgaz i tt-yettwalin kan d taɣawsa n zzhu ara yezzuznen ccehwat-is. Akken diɣen i d-tefka tamuɣli-s ɣef sin i tezdi tayri ilaq ad cerken akk tilufa n tudert, ad ttemɛawanen deg way-gar-asen akken ur d-tɣelli ara teɛkemt ɣef tmeṭṭut kan.
Tadist yettwaneɛlen d ungal i d-yuwin amaynut i tsekla-nneɣ ama deg yisental ama deg tsiwelt acku yules-aɣ-d tidyanin i yettkemmilen deg yimal (anticipation). Seg trewla n Razan si Surya ɣer tmettant n yelli-s Damya, imeɣri ad yinig gar ccabaḥa tudyizt n wullis d usḥissef ɣef tedyanin i yedder yal awadem n wungal.
Xas d Tadist yettwaneɛlen, maca d tadist daɣen n wungal yernan azrureg i tsekla taqbaylit n wass-a d uzekka.
Larbi YAHIOUN
