Suref-iyi kan a Tangalt imi aṭas aya ur d-dliɣ fell-am, aql-i deg umḍiq n d acu- t d acu-t ? Yecban amkan-nni n wis d acu-t ɣer yessefqad Tahar ould Amar .
Imejjayen gʷten, ma d aṭan yugar ḥellu.
Ad m-iniɣ tidet, nettaf-d abrid i wemkan-nni n wis d acu-t, ula wagi n d acu-t d acu-t.
Ṭeglellin yemdanen akken llan, ussan-agi i ɣ-d yegʷran neskerkir-iten d askerker.
Si tama llan wid d-ijebbden tameẓẓuɣt, si tayeḍ, llan wid i ɣ-iqemmcen allen, dɣa nesḍerful am igʷnedyaz n ṭerkunt.
Dagi, ṭag ɛla men ṭag s tkerkas, neɣ d ssuq-nni ibawen, yal wa d ibawen-is i yettmaččan, ibiw n gma-s d iclem kan.
Ssaǧawen ayen ur d ḥellan, dɣa m’akka d-nnulfa tagi d yettawin tteffaḥ i zegren i sebɛa lebḥur (IA), ufan lebṣel i weɣrum, wa di ccna wa di tira.
Amek ard ḍillen ɣur-m a Tangalt wid yettwalin s wezgen n tiṭ ?
Muqleɣ wi kem id-yettẓuṛun, ufiɣ mačči yaṭas, amek akka, ayen d yettawin tamussni ttkukrun medden a twalin ?
Akken i kem ssneɣ, d ayen yelhan kan i d-qqareḍ ?
Ihi,ulayɣer teččḥed, ula d iẓeḍwan d yemmalen tidet, ɣunzan-ten medden.
Tura tewweḍ s ajmam, mi tennfel ad tini kra.
Hat-an ihi, icufaɛ nnbi lumma-as.
Mi nenwa tṣeggem dayen
Azger issexreb azeṭṭa
Tennerni, tluɣ amek akken
Ans’ara s d kkeḍ a ssimra
I tidak i d-aɣ yuɣen
Ma kkant-aɣ-id si tarwa
Yahia Sail
