Nuɣal ddurt-a s amkan-nni wis d acu-t. Teziɣ, tenḍeɣ di tebḥirin, akken i yuɣeɣ tannumi, alarmi i d iyi-d-yedheṛ yiwen n wergaz walaɣ-t yakan di tteswirat. Icebba-yi-d Rebbi d Belkessam Ben Sedira. Qerbeɣ ɣur-s
Tangalt : Azul mass Ben Sedira !
Belkassem Ben Sedira : Mmreḥba bi-k ya benti. Enfin, je te rencontre.
Tangalt : Ihi, teneḍ-iyi, teẓrid anta i d nek.
B.B.S : Ckun li ma yeɛrefc-k ya Tangalt fi had leblad wis d acu-tt
Tangalt : tceɣeb-iyi yiwet n temsalt…
B.B.S : wac ḥeyer-k ya benti ?
Tangalt : vous me répondez instinctivement en arabe algérien, alors que vous qualifiait cette langue de « arabe vulgaire ».
B.B.S : (yecmumeḥ) d wagi i wumi qqaren « chassez le naturel, il revient au galop ». Ɣur-m lḥeq a yelli, akka i tuɣ neqqar-as i teɛrabt n Lezzayer. Imiren, tamusni-nneɣ d tin i d aɣ-mlan irumyen. Tamusni-nneɣ ur tewwiḍ ara aswir n wass-a.
Tangalt : semmeḥ-iyi, yezmer ayen ara k-d-inɣ ad k-yessendef…
B.B.S : ini-d a yelli,ula d nekk yeččur wul-iw.
Tangalt : aṭas i d as-yeqqaren Ben Sedira yedda d fransa, leqdic-is ɣef tutlayin n « les indigènes » yesnerna di lǧehd n « colonialisme ». Yettusemma nniya-ak mačči d lebni n tutlayin. Suref-iyi ma twalaḍ qessiḥ wayen akka k-d-niɣ.
B.B.S : (yecmumeḥ daɣen). Ur qessiḥ ara, sliɣ i wayen yugaren aya. D tidet, uɣeɣ tarumit, uɣaleɣ d arumi di lekwaqeḍ, ibudd-iyi leḥkum afransis s cciɛat… Aya dayen yellan, dayen d-ibanen. Ur mmxalafeɣ ara ɣef tsuta-inu n tallit-nni, widak-nni i wumi teqqarem ass-a «les culturalistes », nedda meṛṛa d waḍu d-ihubben. Uriɣ ɣef teɛrabt « vulgaire », ɣef teqbaylit … Uran daɣen iserkasen n Fransa, imrabḍen irumyen… D tidet, yal wa d iswi-is. Tura, d nekk ara kem-steqsin. Yenfeɛ-iken, ass-a, wayen i yuriɣ akked wayen uran wiyiḍ ?
Tangalt : Yenfeɛ.
B.B.S : D wa i d ṣeḥ. Ayen nniḍen d awal kan, ulac win i ikecmen deg ul n wayeḍ akken ad iẓer s anda i imal.
Tangalt : suref-iyi ma yella jerḥeɣ-k.
B.B.S : Ala a yelli : ulac ajraḥ ulac andaf. D iri-tt kan tmuɣli yettnadin ɣeff temlel akked tebrek, tzeggel timɣiwin yellan gar-asent.
Tangalt : Amek k-d-banent tutlayin n Tmurt ass-a.
B.B.S : tamusni n wass-a tedda ar sdat. Aṭas n temsal ara bdleɣ di leqdic-iw, lukan iyi-d-mazal yid-wen. Ass-a, tettmeslayen ɣef tmaziɣt, ɣef l’arabe algérien…
Tangalt : yelha neɣ diri-t ?
B.B.S : yakk nniɣ-am maččid tamsalt n yelha neɣ diri-t, mellul neɣ berrik. Ayen « yelhan » ass-a, yezmer ad t-ifat lḥal azekka. Ayen dir iḍelli, yezmzr ad yili yelha ass-a. Kulec icud ɣer wenwiwel n tmetti.
Tangalt : Anwa-t wergaz-nni ɣer tama-k ?
B.B.S : D Lhechemi Ben Si Lounis.
Tangalt : ?
B.B.S : Ur t-tesineḍ ara ?
Tangalt : ala.
B.B.S : wa d aselmad-iw. Yezwar-iyi s annar. Amek akka ur t-tesinem ara ?
Tangalt : Mačči d yiwen i tezgel tmusni-nneɣ.
Tahar Ould Amar
