Riɣ ad steqsiɣ ɣef ṣṣwab yuɣen temlel d tidet. ꓩer tafat-iw ara rzuɣ, tafat-nni i itekksen ṭṭlam i ṭṭlam-is. Rziɣ ɣer tilawt, ufiɣ-tt tettŗaju tidet ara s-yesyekksen tilawt i tidet n tilawt-is. Awi-d kan ad myussanen yiḍ d wass asmi ara mlilen yiṭij d waman! Tedduɣ teffeɣ-iyi tikli mi ttnadiɣ timdukkelt n tegmat, ufiɣ-tent ttargunt ssalqafent, tettunt iṭij aman yessawalen awal.
Mi ttwakersen wawal d wakal -tayuga i uxemmem- deg unnar n tidet yessarwaten tilawt-is; tettufra-d tsusmi i yal aɣbel yesteqsayen. Mačči d aḥulfu n wallaɣen ara yekksen axemmem i wulawen, skud yiwet n tfekka ay ddmen…ulac nnehta nnig n tsusmi i yal aɣbel yesteqsayen. Iḥuffan n tmazɣa-nneɣ, d iḥulfan n teqbaylit-iw… ayen ffɣen wulawen, ad t-ssiwlen wallaɣen.
Mmektaɣ-d inɣi n temẓi mi yezzef yemɣi n tirɣi. Anda-kem a tiɣri n tayri? Anda yunagen-tt teyriwen-nneɣ ara ɣ-yesdukklen? Ay tecbeḥ tsekla s yiğeğğigen-is lemmer tufa isekkilen-is: amek i ttemyeɣẓazen wawal d wakud deg yisteqsiyen-nneɣ? Nessaram ad aɣ-d-tefk ccbaḥa (tahuski) tarusi, yal aḥulfu ad yissin tayri-s, tayriwin-ines. Tixeṛ-asen i wulawen ad ssefrun, tayri-nsen d tafat-nsen. Tewser tessen temẓi-ines…
Ma ɣziɣ akka d wakka, ad d-afeɣ ṣṣwab-iw yečča-t usigna, tedduɣ ur ẓriɣ anda. Wissen ahat d ayen yura usekkil ur ssineɣ yeffɣen tutlayt-iw. Ay tecbeḥ thuski tamedyazant ma tezmer-as i tsekla-ines, i tira-ines! Tal tira tutlayant s uxemmem-is: d tazemmurt, d tagrurt…i d tawennaṭ-iw. Tal tira d tasekla. Mačči d ixf n usteqsi i d amnaṛ; d axxam yeddem wakal d awal.Win yeṭṭef lewhi n lebɣi, ad t-yaf d iri-s d asteqsi. Ccwi kan tella tsusmi, tettara-ya -ɣ-d ṛṛuḥ.
Tikkwal, tamedyezt tessufuɣ lewhi i tsekla. D ayen iɣef nudaɣ ur ssineɣ i yessawḍen ɣer wayen i riɣ (bɣiɣ) ad t-issineɣ. Steqsaɣ ɣef wusawen yekkukran taksart-is, ufiɣ-t tɣunza-t luḍa-s. Ihi…anwa abrid ara ɣ-yawin? Ar t-nawi ma d abrid-nneɣ; awi-d kan ma yessen lewhi-s. Mačči d asgunfu i d aɣbel n tikli, d iswi i d ixf n tikli-s…tal tasekla s tutlayt-is. Anda i teεreq tmagit tamezrayant, ad as-nessiwel i tsekla tamedyazant. Tarwa d tafat n tirga: anda turez, tella tira-nneɣ. Ay iṭij-nneɣ…glu-d s waman!
Ah lemmer, tayuga ″Awal-Akal″ d iswi n usteqsi! Ar d ad d-yili d ttawil d asteqsi! Ulac asteqsi nnig n tilawt yettḥuffun tidet-is. Tenɣa-yi temẓi n tewser, yessawsar yitri-w temẓi. La ttxemmimeɣ kan, ur ẓriɣ ayen! Asmi i nuli i d-neɣli, ayɣer wissen iwumi? Teffeɣ tririt i westeqsi-w. Ar tissin dɣa tiṭ lecfaṛ-is! Ur yemyagar wegrireb-iw d temyigert-is, ula d aɣilif-nni-nneɣ…iɣunfa-yaɣ.
Din tura i teqqim! Tal tira s tegnewt-is, yal asekkil s uxemmem-ines.Tira d amezruy n yiḥulfan n tsekla…tudert-nneɣ d ṣṣwab n wezref. Nessawal tidet n tilawt, akal ur d akal d awal. Ahat d ayen ur iqebbel leεqel i d ixf n tudert yessawalen i l mut-is ″Absurde″? Ad as-neğğ tilelli i wawal ara yissinen tilelli-s: ayen nniḍen d ayen-nni-nniḍen ara ɣ-yawin ɣer tektiwin yuɣen axemmem. Ah lemmer nettaru…asmi nettmeslay. La snuzgumeɣ deg unezgum…
Moh Laid Deflaoui
