Qrib ad ssalin at taddart anejmuɛ. Fran-tt di ṛṛay ɣef tejmilt ara ter taddart i Yidir. Tesegra-d Sadiya n L’euro : “anda yebɣu yemḍel, ulac win ar aɣ-t-yeksen. Ha-t-an (twehha s uḍaḍ-is si igenni) d itri di tegnawt n Taddart”. Yerɛeḍ wemraḥ n lakul s userfeq akked weslilew. Mi d-ters cwiṭ n tsusmi inṭeq-d Belqa : “Ihi, akken nemmsefham, ad nheyyit iman-nneɣ si tura, gar-aɣ tlata n wagguren ad d-yili usebded n Yidir deg Weswel, adrar-ines”.
Ifuk unejmeɛ, rran ɣer tmacint n zman. Akken kan yekker Lbacir ad yaru 1827, yeseḥbes-t Belqa : “ imi fat ur nebɛid ara ɣef tallit n Si Mḥand Umḥand, acu tennam lukan ad nruḥ ad t-id-nẓer. Sakin ad nɛeddi ɣer Dey Hussein ?”
Rriglan tamacint ɣef 1877, rnan isem n Si Mḥand Umḥand. Amecwar akka, afen-d iman-nnsen di temnaṭ n Lqala. Amkan-nni d ljennet : tizegzewt, aman, ijeǧǧigen, les flamands roses… Imuqel Lbacir akka d wakka, almi i as-d-iban yiwen wergaz yecmumuḥ i tefsut. Ad yesɛu azal n tlatin sna di leɛmer-is. Taččamart-is n kra n wussan. Lqed-is ur iban ara : isenned ɣef ttejra, yessehmay iɣsan-is i yiṭij n meɣres. Wis d acu iwumi d-stufan iḍuḍan-is? D win ! D asefsi-nni ! D les nuages n Baudelaire qui vont pousser en lui «un chant plein de fraternité, un chant plein de joie, de lumière et d’espérance »
Yerra wergaz-nni agirru s imi-s, yejbed, yerra-d abu akked nnehtat sur fond : « nnaɣ a sidi Rebbi, anwa igenni i deg telliḍ ! ». Yeggugem Lbacir akked Belqa. Ččan-t s wallen. Dɣa isuɣ Belqa : « d netta ya ddin uqabac! ». Qerben s amedyaz, iserreḥ-as i usefru Lbacir :
« Si Mḥand U mḥand ay asefsi
win k-yeslan ad yefsi
yeḥla win yellan d amuḍin ».
Yerfed umedyaz aqerru-s, ad yaɛqel ansi d-kkan rkuẓ. Ur iwala ḥed, imuqel agirru, yenna-yas :
«Ay asefsi n Tunes
Bezzaf n duqqes
Ad d-yarew wabbu lmuḥal»
Yenḥeq Lbacir , iluɛa amedyaz:
– D nekk, mačči d asefsi i yessefran!
– Anwa-k a keč?
– D Lbacir, unageɣ-d nekk d yimeddukal-iw si Taddart n mayyu 2020.
– Yah! Amek tella Tmurt n 2020?
– Tettnaɣ d yiman-is!
– I Fransa, mazal-itt ? Lbabur, mazal-it yuɣwas ? I lxalat-nnwen?
– Fransa ulac-tt. Lbabur mazal-it yesliliw. Ma d laxalat, ulac. Tura neqqar tibannagin.
– Yah, akka ! Awi-yi-d ziɣ yiwen seg yisefra n 2020
– ‘’Ay asmi yid-neɣ teḍra, am tejlabt izamaren
Kkan-d akk s-ya wa s-ya, qwan skud mlan
Mi d-yekcem wucen di ttnasfa, kul yiwen sanda yerra
Ur ksan, ur d-uɣalen… »
– Akka akk i teḍra yid-wen! Ini-as i bab n usefru : ad yerḥem Rebbi taɛebbuḍt i deg texbabdeḍ.
Tahar Ould Amar
